بگوٹا، 29جنوری(ایس او نیوز؍آئی این ایس انڈیا) کولمبیا کے کیریبین علاقے میں پولیس تھانوں کو ہدف بنا کر کیے گئے بم دھماکوں کے دو واقعات میں دو پولیس افسر ہلاک اور سات دیگر زخمی ہو گئے۔ حکام نے بتایا کہ یہ واقعہ کل دیر رات پیش آیا۔ غور طلب ہے کہ ایک دن پہلے ایک تھانہ کے باہر اسی طرح کئے گئے بم دھماکے میں پانچ اہلکار ہلاک اور 40 دیگر زخمی ہو گئے تھے۔ پولیس نے ایک بیان میں بتایا کہ دھماکے کا سب سے پہلا واقعہ دیہی بولیور صوبے میں ہوا جہاں دو افسران مارے گئے اور ایک دیگر زخمی ہو گئے جبکہ اس واقعہ کے چار گھنٹے بعد بعد سولیداد میں دوسرا بم دھماکہ ہوا جس میں پانچ پولیس افسران سمیت چھ لوگوں کی موت ہو گئی۔بولیور صوبے کے گورنر ڈومیک تربے نے ٹوئٹر پر لکھا کہ یہ ’’تشدد،نفرت اور انتہائی بزدلانہ کارروائی’’ ہے۔صدر جوآن مینوئل س سینتوس نے مارے گئے پولیس اہلکاروں کے تئیں گہرے رنج وغم اور زخمیوں کے تئیں تعزیت کا اظہار کرتے ہوئے کہا ‘‘جب تک واقعہ کے حملہ آور پکڑے نہیں جاتے تب تک ان کی حکومت چین سے نہیں بیٹھے گی‘‘۔ انہوں نے اسپتالوں میں جا کر زخمیوں سے خیریت بھی پوچھی۔ ساحلی شہر برانکولا میں پولیس تھانہ کے باہر ہفتے کی صبح میں ہوئے دھماکے کے سلسلہ میں پولیس نے اب تک ایک شخص کو گرفتار کیا ہے۔ پولیس کو خدشہ ہے کہ مجرم گروہوں کے خلاف چلائی گئی مہم کے انتقام میں بم دھماکے کے واقعات کو انجام دیا جا رہا ہے۔کولمبیا میں بہت سے مجرم گینگ سرگرم ہیں۔ بہت سے گینگ منشیات، کوکین کی پیداوار اور اسمگلنگ میں ملوث ہیں جو کہ بڑے پیمانے پر امریکہ اور یوروپ بھیجا جاتا ہے. اس کے علاوہ بھتہ خوری اور دیگر جرائم میں بھی یہ گروہ شامل ہیں۔