مینگلور کے قریب پتورمیں تعمیراتی سائٹ پرمٹی ڈھلنے سے 2مزدور ہلاک
مینگلور 24؍اپریل(ایس او نیوز) قریبی علاقہ پتور کے نیلّی کٹّے نامی مقام پرتعمیراتی سائٹ کی مٹی اچانک ڈھلنے سے 2مزدور ملبے میں دب کر ہلاک ہوگئے۔جبکہ دیگر 4مزدوروں کو بچالیا گیا ہے۔
موصولہ رپورٹ کے مطابق انیتا آئل مل کی عمارت کے لئے سائٹ پر کھدائی اور تعمیراتی کام جاری تھا کہ اچانک مٹی ڈھل گئی اور جملہ 6مزدور کیچڑ اور گیلی مٹی میں دب گئے۔ ان میں سے چار کو کسی طرح کیچڑ سے باہر نکال لیا گیا مگر 2مزدور دم گھٹنے سے ہلاک ہوگئے جن کا تعلق ضلع کوپل کے کُشٹگی سے تھا۔ مرنے والوں کی شناخت پدمنابھ (35) اور شیونّا (40) کی حیثیت سے کی گئی ہے
بچائے گئے دو مزدوروں کو اسپتال میں داخل کیا گیا ہے جن کی شناخت مہانتیش اور یشونت کی حیثیت سے کی گئی ہے ۔مزدوروں کو مٹی کے اندر سے نکالنے کی مہم میں ہندو اور مسلم تنظیموں کے کارکنان نے ایک دوسرے کا ہاتھ بٹایا۔
حادثے کی خبر ملتے ہی ایم ایل اے شکنتلا شیٹی ، تحصیلدار اور علاقے کے اہم لیڈران موقع پر پہنچ گئے۔ عوام کی کثیر تعداد بھی وہاں جمع ہوگئی اور پولیس کو انہیں قابو میں رکھنے کے لئے شدید مشقت کرنی پڑی۔کہاجاتا ہے کہ غیر سائنٹفک انداز میں تعمیراتی کام اور اس علاقے میں بھاری موٹر گاڑیوں کی آمد ورفت کی وجہ سے مٹی ڈھلنے کا یہ حادثہ پیش آیا ہے۔پولیس نے معاملہ درج کرلیا ہے اور مزید تحقیقات جاری ہے۔