بھٹکل میں 80 لاکھ مالیت کی غیر ملکی کرنسی کے ساتھ دو گرفتار
بھٹکل 13/ڈسمبر (ایس او نیوز) قریب 80 لاکھ مالیت کی غیر ملکی کرنسی کے ساتھ بھٹکل پولس نے دو لوگوں کو گرفتار کرلیا ہے جن کی شناخت بھٹکل قاضیہ اسٹریٹ اور تکیہ اسٹریٹ کے حسن شبر اور عُمیر احمد کی حیثیت سے کی گئی ہے۔
بتایا گیا ہے کہ یہ دونوں متعلقہ کرنسی کے ساتھ بذریعہ ٹرین گوا سے مینگلور جارہے تھے ، مصدقہ اطلاع پر بھٹکل پولس نے کاروائی کی اور مرڈیشور اسٹیشن سے ہی متعلقہ ٹرین پر سوار ہوکر ان دونوں کو کرنسی سمیت اپنی تحویل میں لیا ۔
پولس ذرائع کے مطابق ان دونوں کے پاس سے ڈالر، پونڈ، یورو، درہم، ریال وغیرہ برآمد کئے ہیں اور جملہ کرنسی کی مالیت انڈین روپئے کے حساب سے 80 لاکھ بتائی گئی ہے۔
دونوں کو تحویل میں لیتے ہی بھٹکل پولس نے مینگلور کسٹم حکام کومعاملے کی جانکاری دی اور مینگلور سے روینو انٹلی جینس کے اسسٹنٹ ڈائرکٹر شریاس اپنے اہلکاروں کے ساتھ بھٹکل پہنچ کر دونوں سے پوچھ تاچھ شروع کردی۔ متعلقہ سبھی کرنسی بھی مینگلور حکام کے حوالے کی گئی ہے۔
پتہ چلا ہے کہ یہ دونوں گوا کے سیاحوں سے انڈین کرنسی کے بدلے غیر ملکی کرنسی خریدتے تھے چونکہ سیاحت کے لئے مشہور گوا میں غیر ملکی سیاحوں کی بھیڑ جمع رہتی ہے، اُنہیں انڈین کرنسی کی ضرورت پڑتی ہے، یہ لوگ 10 فیصد کمیشن رکھ کر غیر ملکی کرنسی حاصل کیا کرتے تھے۔