بنٹوال: عیسائیوں کے مذہبی مقام کو نقصان پہنچانے کے ملزمین گرفتار
بنٹوال30؍سمبر (ایس او نیوز) دو تین دن قبل کولناڈو کے قریب کولال میں عیسائیوں کے ایک مذہبی مقام کو توڑنے او رمذہبی منافرت پھیلانے کے الزام میں پولیس نے جیا رام نائک اور مونپّا نائک گرفتار کرلیا ہے۔
یاد رہے کہ 27ستمبر کی رات کو کولال میں واقع مذہبی مقام کی حیثیت والے مدر میری کے مجسمہ اور مصنوعی غار کی علامت کو منہدم کردیا گیا تھا اور اس مقام پر کچھ مورتیاں رکھ دی گئی تھیں۔اس کے ساتھ ہی دوسرے مذہب کی علامت والے جھنڈے لگائے گئے تھے۔ بتایا جاتا ہے کہ مذکورہ مقام پر مدرمیری کا مجسمہ اور غار نما ڈھانچہ 1970سے موجود ہے
عیسائیوں کے اس مقام پر توڑ پھوڑ کرنے اور دوسرے مذہب کی مورتیاں نصب کرنے کی واردات پیش آنے کے بعد عیسائی طبقے نے پرزور مذمت کرتے ہوئے احتجاجی مظاہرے کا منصوبہ بنایا تھا۔
وٹھلا پولیس نے تحقیقات کرتے ہوئے اس واقعے میں ملوث ملزمین کو گرفتار کرلیاہے۔ملزمین کو 12اکتوبر تک عدالتی حراست میں بھیجا گیاہے۔ اس سے پہلے جنوبی کینرا کے ایس پی روی کانتے گوڈانے رات کے وقت حفاظتی ڈیوٹی پرمامور پولیس بیٹ کانسٹیبل اشوک کو اپنی ذمہ داری ادا کرنے میں غفلت کی وجہ سے معطل کردیا تھا۔