نئی دہلی،20؍اگست (ایس او نیوز؍ آئی این ایس انڈیا ) یوم آزادی سے دو دن پہلے راجدھانی کے انتہائی محفوظ علاقے پارلیمنٹ سے چند قدم کے فاصلے پر واقع کانسٹی ٹیوشن کلب آف انڈیا کے باہر سر عام جے این یو کے طالب علم عمر خالد پر جان لیوا حملے کے معاملے میں دہلی پولس کی اسپیشل سیل نے دو لوگوں کو حراست میں لیا ہے ۔
ذرائع کے مطابق تو یہ دونوں وہی لڑکے ہیں جنہوں نے 15اگست کو ایک ویڈیو پوسٹ کرکے عمرخالد پرحملے کی ذمہ داری لی تھی۔ ذرائع کے مطابق دونوں کے نام نوین دیال اور درویش شاہ پور بتایاجا رہاہے ۔ان دونوں نے عمر خالد پر 13اگست کو ہوئے حملے کی ذمہ داری لی تھی۔انہیں17اگست کو اپنی گرفتاری دینی تھی لیکن انہوں نے ایسا نہیں کیا۔اسپیشل سیل کے مطابق خفیہ اطلاع کی بنیاد پر دونوں کوہریانہ سے گرفتار کیا گیاہے ۔
پولس اب ان دونوں کو مجسٹریٹ کے سامنے پیش کرے گی جہاں ان کا ٹی آئی پی کرایا جائیگا۔ٹی آئی پی کا یعنی(ٹیسٹ آئی ڈینٹیفکیشن پریڈ) اس میں پولس ملزمین کو مجسٹریٹ کے سامنے پیش کرتی ہے ۔ٹی آئی پی روم کے درمیان میں کالے شیشے کی فلم چڑھی ہوتی ہے ۔اسمیں ایک طر ف ملزم ہوتے ہیں اور دوسری طرف متاثرہ اورمجسٹریٹ۔ ملزم کے ساتھ کچھ لوگ اور کھڑے کئے جاتے ہیں اور متاثرہ کوملزم کی شناخت کرنی ہوتی ہے۔