بجپے میں غیر قانونی ذبح خانہ چلانے کے لئے دو بھائی گرفتار
منگلورو،17؍جولائی (ایس او نیوز) بجپے کے اَڈّور نامی علاقے میں غیر قانونی طور ذبح خانہ (سلاٹر ہاؤز) چلانے کے الزام میں بجپے پولیس نے دو بھائیوں کو گرفتا رکر لیا ہے جن کی شناخت مصطفی (۲۷سال) اور عبدالمجید (۲۳سال)کی حیثیت سے کی گئی ہے۔
پولیس کے مطابق بجپے انسپکٹر ٹی ڈی ناگراج کی قیادت میں ایک خصوصی ٹیم نے چھاپہ مارکر ان دو بھائیوں کو گرفتار کیا ہے جن کے بارے میں بتایا گیا ہے کہ ان دونوں پر پہلے ہی سے بجپے پولیس اسٹیشن میں6کیس، سورتکل پولیس اسٹیشن اور کاوور پولیس اسٹیشن میں ایک ایک کیس درج ہے۔پولیس کا کہنا ہے کہ 16جون کو اَڈّور کے مقام پر چھاپہ مارتے ہوئے انسپکٹر ٹی ڈی ناگراج کی ٹیم نے ایک ٹیمپو ٹراویلر، ایک رٹز کار اور ایک ڈسٹر کار کے ساتھ 16مویشی ضبط کیے تھے۔ اس معاملے میں مذکورہ بالادوبھائیوں کی تلاش جاری تھی۔چونکہ دونوں بھائی اس واقعے کے بعد لاپتہ ہوگئے تھے اس لئے پولیس اب تک انہیں گرفتار نہیں کرپائی تھی۔پولیس کا الزام ہے کہ یہ دونوں بھائی چوری کیے گئے جانور خریدکر قصائی خانہ چلایا کرتے تھے۔