ممبئی،21؍ فروری (ایس او نیوز؍آئی این ایس انڈیا)مغربی ریلوے لائن پر یہاں ایک لوکل ٹرین کے اندر آج صبح تقریباً آٹھ مسافروں نے ایک سینئر ٹی وی صحافی پر مبینہ طور پر حملہ کیا۔ریلوے پولیس کے ایک افسر نے بتایا کہ ہندی نیوز چینل میں کام کرنے والے سدھیر شکلا حملے میں زخمی ہو گئے۔واقعہ میرا روڈ اور اندھیری ریلو ے اسٹیشنوں کے درمیان ہوا۔سرکاری ریلوے پولیس (جی آر پی) کے سینئر حکام نے کہاکہ لوکل ٹرین کے فٹ بورڈ پر کھڑے مسافروں کے ایک گروپ نے یہ کہتے ہوئے شکلا کو اندھیری جانے والی ٹرین میں چڑھنے سے روکا کہ اندر جگہ نہیں ہے۔انہوں نے کہاکہ حالانکہ شکلا ٹرین میں چڑھ گئے جس کے بعد ان کے اور ان مسافروں کے درمیان بحث شروع ہو گئی۔افسر نے بتایا کہ اس کے بعد گروپ نے انہیں پیٹنا شروع کر دیا اور جب شکلا نے ان کی تصاویر لینے کی کوشش کی تو ان کا فون بھی چھین لیا۔حملے میں زخمی ہوئے ٹی وی صحافی کو علاج کے لئے اسپتال لے جایا گیا۔ مغربی ریلوے جی آر پی کے پولیس ڈپٹی کمشنر پروشوتم کراڈ نے کہاکہ ان کا علاج مکمل ہونے کے بعد ہم ملزمان کی شناخت کے عمل کو شروع کریں گے اور ان کے خلاف انتہائی سخت کارروائی کی جائے گی۔انہوں نے بتایا کہ اندھیری میں جی آر پی یونٹ میں اس سلسلے میں مقدمہ درج کیا جا رہا ہے۔ممبئی پریس کلب نے واقعہ کی مذمت کرتے ہوئے ایک بیان میں کہا کہ اس نے حکومت اور پولیس اتھارٹی کو مطلع کر دیا ہے اور حملہ آوروں کی گرفتاری کا مطالبہ کیا ہے۔