اقوام متحدہ6ستمبر ( ایس او نیوز؍آئی این ایس انڈیا ) اقوام متحدہ میں امریکا کی خاتون سفیر نکی ہیلے نے بتایا ہے کہ صدر ڈونلڈ ٹرمپ رواں ماہ نیویارک میں عالمی رہ نماؤں کے سالانہ اجتماع کے دوران سلامتی کونسل میں ایران کے حوالے سے ایک اجلاس کی صدارت کریں گے۔ اجلاس کا مقصد "ایران کی جانب سے بین الاقوامی قانون کی خلاف ورزیوں" اور پورے مشرق وسطی کو عدم استحکام سے دوچار کرنے کے لیے تہران کی کارستانیوں پر روشنی ڈالنا ہے۔

ادھر سفارتی ذرائع کا کہنا ہے کہ ایران 26 ستمبر کو ہونے والے مذکورہ اجلاس میں گفتگو کا مطالبہ کر سکتا ہے۔ توقع ہے کہ ایرانی صدر حسن روحانی 25 ستمبر کو اقوام متحدہ کی جنرل اسمبلی سے خطاب کریں گے۔

نکی ہیلے نے منگل کے روز صحافیوں سے گفتگو میں کہا کہ امریکا کو روحانی کے خطاب کرنے پر کوئی اعتراض نہیں ہو گا۔

دوسری جانب اقوام متحدہ میں روسی سفیر کے نائب دمتری پولیانسکی کا کہنا ہے کہ ایران سے متعلق اجلاس میں اس امر پر توجہ ناگزیر ہو گی کہ 2015ء میں ایران کے حوالے سے جاری قرارداد پر عمل درامد یقینی بنایا جائے۔