نیویارک 26ستمبر(ایس او نیوز ؍آئی این ایس انڈیا)امریکی صدارتی امیدوار ڈونلڈ ٹرمپ نے کہا ہے کہ انتخابات میں اپنی کامیابی کی صورت میں وہ یروشلم کو اسرائیل کے غیر منقسم دارالخلافے کے طور پر تسلیم کر لیں گے۔ ٹرمپ کی انتخابی ٹیم کے مطابق ٹرمپ نے اسرائیلی وزیر اعظم نیتن یاہو کے ساتھ ایک ملاقات میں اعلان کیا کہ وہ اس سلسلے میں امریکی کانگریس کی طرف سے 1995ء میں منظور کیے گئے اُس قانون پر دستخط کر دیں گے، جس پر اب تک کسی بھی ری پبلکن یا ڈیموکریٹ صدر نے دستخط نہیں کیے۔ نیویارک میں ٹرمپ اور نیتن یاہو کی نجی نوعیت کی یہ ملاقات ڈیڑھ گھنٹے تک جاری رہی تھی۔ اسرائیل نے 1967ء کی چھ روزہ جنگ کے دوران یروشلم کے مشرقی حصے پر قبضہ کر لیا تھا اور 1980ء میں اسے جبراً اپنے ساتھ ملا لیا تھا۔ اقوام متحدہ کے زیادہ تر ارکان اس جبری الحاق کو تسلیم نہیں کرتے۔