سیتامڑھی (بہار) 12/ستمبر (ایس او نیوز/ محمد صدرعالم نعمانی) ریاست بہار کے  پوپری کی ایک مسجد  میں تیز رفتار ٹرک گھس کر  ظہر کی نماز پڑھ کر باہر آنے والے نمازیوں کو روند ڈالنے کے نتیجے میں تین نمازیوں کی موت واقع ہوگئی، جبکہ ایک نمازی شدید زخمی ہوگیا، جس کی حالت نازک بتائی گئی ہے۔

حادثہ   بچھار پور کے نیرا ٹولہ کی مسجد میں ظہر کی نماز کے وقت پیش آیا۔ مرنے والوں کی شناخت  الحاج محمد ظہیر، محمد نصیر. دو نوں سگے بھائی اور محمد ظہیر الحق کی حیثیت سے کی گئی ہے۔ حادثے میں ان تینوں  کی جائے وقوع پر ہی موت واقع ہوگئ جبکہ رحمت علی شدید زخمی ہوگئے جن کا علاج پوپری کے اسپتال میں کیا جارہا ہے

حادثے میں  محمد اشتیاق کی بھیس بھی مرگئی جبکہ  گھاس  پھوس کا ایک مکان بھی گاڑی کی زد میں آنے سے گرگیا.ٹرک ایسی بے قابو ہوئی کہ ٹرک کی زد میں  دوموٹر سائکل اور ایک سایکل بھی  آگئی۔ ان سبھو ں سے ٹکرانے کے بعد ٹرک  مسجد کی چہار دیواری اور بیت الخلاء کی دیوار سے ٹکراگئی تھی،جس سے دونوں دیوار بھی گرگئی۔

عینی شاہدین نے بتایا کے ظہر کی نماز پڑھ کر نمازی  جیسے ہی مسجد سے باہر نکلنے لگے  اچانک سیتامڑھی کی جانب سے تیز رفتار سدھاڈیڑی کی ٹرک مسجد کے اندر گھس گئ جب تک نمازی کچھ سمجھ پاتے اس وقت تک چار نمازی گاڑی کی زد میں  آچکے تھے.

 حادثہ سے پورے علاقہ میں کہرام مچ گیا. اطلاع ملتے ہی پوپری کے  پولس افسران اپنے عملہ کے ساتھ جائے وقوع پر پہونچ کر زخمی کو علاج کیلئے پوپری لے گئے. جبکہ ڈرائیور  کو بھی اپنی نگرانی میں ساتھ لے گئے. اس حادثہ سے پورے محلہ میں چیخ وپکار مچ گیا اور پل بھر میں پورے علاقے میں رنج و غم کی لہر دوڑ گئی۔ حادثہ کی خبر سنتے ہی ہزاروں لوگوں کی بھیڑ جائے وقوع پر پہونچ کر روڈ کو جام کر دیا جس کی وجہ سے گھنٹوں پوپری سیتامڑھی شاہراہ  پر سواریوں کی آمدورفت رُک گئی۔ نمازیوں نے بتایا کہ ٹرک کا  ڈرائور نشہ کی حالت میں تھا. خیال رہے کہ  روڈ اور مسجد کا فاصلہ کم سے کم 50فٹ ہے.اس کے باوجود گاڑی مسجد سے ٹکڑاگئی  جسکی وجہ سے تین لوگوں کو اپنی جان سے ہاتھ دھونا پڑا، جبکہ چوتھے کی حالت ہنوز نازک بنی ہوئی تھی۔