مغربی بنگال: کرشنا گنج سے ترنمول کانگریس کے ممبر اسمبلی ستیہ جیت بشواس کاقتل
کولکاتہ،10 ؍فروری (ایس او نیوز؍آئی این ایس انڈیا) مغربی بنگال میں سیاسی قتل کا دور ختم ہونے کا نام نہیں لے رہا ہے۔نادیہ ضلع کے کرشنا نگر اسمبلی سیٹ سے ٹی ایم سی کے ممبر اسمبلی ستیہ جیت بشواس کو نامعلوم حملہ آوروں نے گولی مار کر قتل کر دیا ہے۔حملے کی اطلاع ملتے ہی مقامی پولیس موقع پر پہنچی اور زخمی رکن اسمبلی کو اسپتال پہنچایا گیا۔جہاں ڈاکٹروں کی ٹیم نے انہیں مردہ قرار دیا۔پولیس نے اس وقت لاش کو قبضے میں لے کر پوسٹ مارٹم کے لئے بھیج دیا ہے۔پولیس کی خصوصی ٹیم اس پورے معاملے کی فی الحال تحقیقات کر رہی ہے۔معاملے کی تحقیقات کر رہے پولیس کے مطابق بشواس پر اس وقت حملہ ہوا جب وہ جلپائی گڑی ضلع کے پھلباڑي علاقے میں سرسوتی پوجا کے موقع پر پوجا کر رہے تھے۔واقعہ کے وقت بشواس ریاست کے وزیر رتن گھوش اور ٹی ایم سی کے ضلع صدر گوری شنکرکے ساتھ تھے۔پولیس افسر نے بتایا کہ 37 سالہ بشواس کی کچھ دن پہلے ہی شادی ہوئی تھی۔اہلکار کے مطابق ملزمان نے بشواس پر تابڑ توڑ کئی راؤنڈ فائرنگ کی۔