ترنمول کانگریس نوٹ بندی کی وجہ سے مرنے والوں کی فہرست لے کر پارلیمنٹ ہاؤس کے صحن میں آئی
نئی دہلی، 9 /دسمبر(ایس او نیوز آئی این ایس انڈیا) نوٹ بندی کی سخت مخالف میں ترنمول کانگریس آج پارلیمنٹ ہاؤس کے صحن میں ایک بینر لے کر آئی جس میں ان 90افراد کی تفصیلات ہیں جن کی اس نوٹ بندی کے سبب موت ہو گئی۔ ترنمول کانگریس کے راجیہ سبھا کے رکن ڈیریک او برائن نے دعوی کیا کہ اس فہرست میں ان افراد کی تفصیلات ہیں جن کی نوٹ بندی کے سبب موت ہو گئی۔اس کی تفصیل میں ان کے نام اور جائے حادثہ کی معلومات ہے۔کل تک 90لوگوں کی موت ہو چکی ہے،یہ ایک مستند فہرست ہے۔انہوں نے کہا کہ ان کی پارٹی اس فیصلے کے بعد ہی یہ فہرست تیار کرتی رہی ہے۔کانگریس، ترنمول کانگریس، سماجوادی پارٹی اور بی ایس پی جیسی اپوزیشن جماعتوں کا دعوی ہے کہ بینکوں اور اے ٹی ایم کے باہر قطار میں کھڑے رہتے ہوئے سیکڑوں لوگوں کی موت ہو گئی، جبکہ کچھ لوگوں نے نقد رقم کی قلت یا پرانے نوٹوں کو تبدیل کرنے میں اپنی ناکامی کی وجہ سے خودکشی کرلی۔