بنگلور سمیت ریاست کرناٹک کے مختلف مقامات پر زلزلے کے جھٹکے
بنگلورو۔18؍اپریل(ایس او نیوز) ریاست کی راجدھانی بنگلور ، ٹمکور ، رام نگرم، منڈیا اور چامراج نگر کے بعض حصوں میں زلزلے کے جھٹکوں نے آج صبح لوگوں کو دہشت زدہ کردیا۔ آج صبح سویرے زلزلے کے ان جھٹکوں کے سبب گھروں میں برتن ، ٹی وی ، فریج ہلنے لگیں، جس کی وجہ سے لوگ گھبراکر گھروں سے باہر نکل گئے۔حالانکہ اس سے کسی طرح کا نقصان نہیں ہوا۔شہر کے کنگیری ،کاماکشی پالیہ ،گری نگر اور آس پاس کے علاقوں میں صبح ساڑھے سات بجے تقریباً ایک منٹ ہلکے جھٹکے محسوس کئے گئے جس کی وجہ سے لوگ گھروں سے باہر نکل آئے۔ ٹمکور ضلع کے مختلف دیہاتوں ، رام نگرم ، ماگڑی ، کنکاپورہ، چامراج نگر اورکولیگال میں بھی ساڑھے سات اور7-45بجے کے درمیان ہلکی کی شدت کے جھٹکے محسوس کئے گئے ۔ ٹمکور ضلع کے کنگل تعلقہ کے چکے بیٹ ہلی کے قریب یہ زلزلہ محسوس کیاگیا۔ پاؤگڈھ میں بھی ایسی ہی صورتحال رہی ۔حالانکہ زلزلہ کی شدت ریختر پیمانے پر ناپی نہیں جاسکی، لیکن ماہرین کا کہنا ہے کہ یہ ایک ہلکی شدت کا جھٹکا تھا۔ ماہرین اراضیات اور محکمۂ اراضیات کی ڈپٹی ڈائرکٹر لکشمما نے زلزلے کے ان جھٹکوں کی تصدیق کی۔ انہوں نے کہاکہ اس سے پہلے دو ماہ قبل ٹمکور ضلع کے چکنائکنا ہلی اور آس پاس کے علاقوں میں اسی طرح کا جھٹکا محسوس کیاگیا تب اس کی شدت ریختر پیمانے پر 2.9 رہی۔