یلاپور13؍اگست (ایس اونیوز)ضلع شمالی کینرا میں بھاری برسات کی وجہ سے عام زندگی مفلوج ہونے اور کئی مقامات سے نقصانات کی خبریں مل رہی ہیں۔ یلاپور سے موصولہ رپورٹ کے مطابق شہر کے ہائر پرائمری اسکول پر ایک درخت کی شاخ ٹوٹ کر گرنے سے ایک کمرے کی دیوار اور اسکول کے بیت الخلاء کو نقصان پہنچا ہے۔

بتایا جاتا ہے کہ جب یہ حادثہ ہوا اس وقت بچوں کی کلاس چل رہی تھی۔ لیکن پاس کابہت بڑا درخت اکھڑتے ہوئے دیکھ کر پڑوس کے لوگ دوڑے چلے آئے اور چیخ و پکار کرتے ہوئے فوری طور پر بچوں اور اساتذہ کو کلاس سے باہر نکلنے کی ہدایت کی۔ اس طرح آس پاس کے لوگوں کی حاضر دماغی سے بچے بحفاظت کمرے سے باہر نکل آئے اور کسی کو بھی جسمانی نقصان نہیں پہنچا۔حادثے کے وقت اسکول میں 164طلبہ ،6اساتذہ اور باورچی وغیرہ موجود تھے۔

خیال رہے کہ پچھلے چند دنوں قبل اسی قسم کی موسلا دھار بارش سے پورے یلاپور تعلقہ میں عام زندگی مفلوج ہوگئی تھی اور بہت زیاد ہ جانی و مالی نقصان ہوا تھا۔