بنگلورو،27؍ستمبر(ایس او نیوز) نائب وزیر اعلیٰ ڈاکٹر جی پرمیشور نے کہا ہے کہ نجی اسپتالوں میں علاج کے بعد مریضوں کو بھاری رقم کی ادائیگی کے لئے ہراساں کئے جانے کے واقعات حکومت کے عمل میں ہیں، ان واقعات پر روک لگانے کے لئے حکومت کی طرف سے نجی اسپتالوں میں علاج کے لئے شرح متعین کرنے پر سنجیدگی سے غور کیا جارہاہے۔ کورٹگیرے کے ایک گاؤں میں سرکاری پرائمری ہیلتھ سنٹر کی نئی عمارت کا افتتاح کرنے کے بعد انہوں نے کہاکہ ریاستی محکمۂ صحت کی طرف سے نجی اسپتالوں میں شرحوں کا تعین کرنے کا حکمنامہ تیار ہے، عنقریب اسے منظر عام پر لایا جائے گا۔ انہوں نے کہاکہ سرکاری اسپتالوں میں علاج کے لئے جو بہتر سہولتیں حکومت کی طرف سے مہیا کرائی جارہی ہیں عوام ان سہولتوں کا زیادہ سے زیادہ فائدہ اٹھائیں۔ نجی اسپتالوں پر جو لوگ منحصر ہیں ان کی سہولت کے لئے بھی ریاستی حکومت کی طرف سے شرحوں کے تعین کو ایک خوش آئند قدم قرار دیتے ہوئے نائب وزیراعلیٰ نے کہاکہ اس تعین کے ساتھ ہی اسپتالوں میں مریضوں کو ہراسانی کا سلسلہ کافی حد تک کم ہوجائے گا۔ اس موقع پر نائب وزیراعلیٰ نے کہا کہ کورٹگیرے میں اے پی ایم سی مارکیٹ کی تعمیر کا منصوبہ مرتب کیا گیا ہے عنقریب اس پر کام شروع کیاجائے گا۔ یہاں پر پینے کے پانی کی سہولت کے نظام کو بہتر بنانے کے لئے بھی وزیر موصوف نے مناسب اقدامات کا وعدہ کیا ۔ وزیر شہری رسد وخوراک ضمیر احمد خان، ٹمکور ضلع کے ڈپٹی کمشنر ڈاکٹر رکیش کمار، ایس پی دیویا گوپی ناتھ اور دیگر اعلیٰ عہدیدار وغیرہ اس موقع پر موجود تھے۔