مدھیہ پردیش ٹرین بم دھماکہ معاملہ؛ کانپور دہشت گرد ماڈیول کو کارتوس سپلائی کرنے والا راگھویندر سنگھ چوہان گرفتار
کانپور، 29؍مارچ(ایس او نیوز/آئی این ایس انڈیا ) اترپردیش اے ٹی ایس نے کانپور دہشت گرد ماڈیول کی جانچ کے دوران بڑی کامیابی ہاتھ لگنے کا دعوی کیا ہے۔ اے ٹی ایس کی ٹیم نے دہشت گرد ماڈیول کو بھاری مقدار میں کارتوس سپلائی کرنے کے الزام میں راگھویندر سنگھ چوہان کو گرفتار کر لیا ہے۔ اے ٹی ایس کی اگر مانیں تو مشتبہ افراد سے پوچھ گچھ کے بعد چوہان کے نام کا انکشاف ہوا تھا، چوہان ایک آرمس ڈیلر ہے۔دراصل، گزشتہ 7؍مارچ 2017کو مدھیہ پردیش میں ہوئے ٹرین دھماکے کو انجام دینے والے مشتبہ افراد کے پاس سے تقریبا 700کارتوس اور کھوکھے برآمد کئے گئے تھے۔اتنی بڑی تعداد میں کارتوس برآمد ہونا سیکورٹی ایجنسیوں کے لیے تشویش کا موضوع تھا، تبھی سے اس بات کی جانچ کی جا رہی تھی کہ آخر مشتبہ افراد کے پاس اتنی بڑی مقدار میں کارتوس کہاں سے آئے؟
اس معاملہ میں اترپردیش اے ٹی ایس کی ٹیم بھی سرگرم تھی۔اسی دوران اے ٹی ایس نے یہ کارتوس ان مشتبہ افراد کو پہنچانے والے سپلائر کو منگل کی دیر شام کانپور سے گرفتار کر لیا۔ملزم کا نام راگھویند ر سنگھ چوہان ہے، جو کانپور کے ہی گیتا نگر کا رہنے والا ہے۔تھانہ کاکادیو علاقے میں ہی ایل آر ایس آرمس اینڈ ایمیونشن کے نام سے اس کی اسلحہ کی دکان ہے۔اس سلسلہ میں پہلے گرفتار کئے جا چکے مشتبہ افراد سے پوچھ گچھ کے دوران راگھویندر چوہان کا نام شک کے گھیرے میں آیا تھا ، اسی بنیاد پر اس کی ہتھیار کی دکان پر چھاپہ ماری کی گئی۔تفتیش کے دوران اس کی دکان میں بڑا گھپلا پایا گیا۔ملزم چوہان نے میسٹن روڈ پر واقع کھنہ گن ہاؤس اور سیوا گن ہاؤس سے بڑی مقدار میں کارتوس خریدے تھے، لیکن اپنے اسٹاک رجسٹر میں ان کا اندراج نہیں کیاتھا ۔حیرانی کی بات یہ ہے کہ چوہان کے ٹھکانے سے کئی افسران کی مہریں بھی برآمد ہوئی ہیں، جس کے سلسلے میں بھی جانچ کی جا رہی ہے۔اے ٹی ایس جاننا چاہتی ہے کہ ان کا استعمال کہاں کیا جا رہا تھا؟یہ مہریں ضلع مجسٹریٹ، ایڈیشنل ضلع مجسٹریٹ کانپور، ہیلتھ آفیسر بلہور، مختلف گن ہاؤس اور تعلیمی اداروں کی ہیں۔اس کے علاوہ اس کے پاس سے کوٹرچت فروختگی رجسٹر بھی برآمد ہوئے ہیں۔چوہان کو لکھنؤ عدالت کے سامنے پیش کیا گیا ہے۔ اس کارروائی کو اے ٹی ایس نے ڈی ایس پی منیش سونکر کی ٹیم اور ایس پی سٹی کانپور سومیدورما کی مدد سے مکمل کیا۔انچارج انسپکٹر (ریل بازار)ستیش کمار سنگھ اور اے ٹی ایس کے ایس آئی انیرودھ دوبے بھی اس ٹیم میں شامل تھے۔