بھٹکل ساگر روڈ پر آٹو رکشہ اور ٹریکٹر کے درمیان خطرناک ٹکر؛ تین شدید زخمی؛ اسی روڈ پر دو بائک کے درمیان بھی ٹکر
بھٹکل 10/مارچ (ایس او نیوز) یہاں ساگر روڈ ، کسل گیدّے کراس پر اتوار شب کو پیش آئے ایک سڑک حادثے میں تین افراد شدید زخمی ہوگئے، جن میں دو کو منی پال اور ایک کو کنداپور شفٹ کیا گیا ہے۔
بتایا گیا ہے کہ آٹو رکشہ مسافروں کو بھر کر بھٹکل سے ساگر روڈ ہوتے ہوئے ماروکیری جارہا تھا کہ ہاڈولی سے بھٹکل کی طرف جارہی ایک ٹریکٹر اچانک سامنے آگئی اور دونوں کی تیزرفتاری کے ساتھ ٹکر ہوگئی۔ ٹکر لگتے ہی رکشہ ڈرائیور سمیت تین مسافر رکشہ سے باہر سڑک پر جاگرے۔ فوری طور پر سبھی زخمیوں کو 108 ایمبولنس کے ذریعے بھٹکل سرکاری اسپتال پہنچایا گیا۔
زخمیوں میں آٹو رکشہ ڈرائیور گنپتی منجوناتھ گونڈا (50) اور مسافر ناگیش وینکٹ رمن موگیر (30) جو ماروکیری کے رہنے والے ہیں کو حادثے میں شدید چوٹیں آئی ہیں اور دونوں کو سرکاری اسپتال سے منی پال اسپتال شفٹ کیا گیا ہے،ناگیش سنّو گونڈا کو بھی سر پر گہری چوٹ لگی ہے، اسے کنداپور لے جایا گیا ہے جبکہ رکشہ پر ایک اور مسافر ناگپا ملیا نائک بھی سوار تھا، جسے معمولی زخم آئے ہیں اور سرکاری اسپتال میں مرہم پٹی کرائی گئی ہے۔
بتایا گیا ہے کہ ٹکر لگنے کے بعد ٹریکٹر ڈرائیور موقع پر سے فرار ہوگیا ہے۔
بھٹکل مضافاتی پولس تھانہ میں معاملہ درج کیا گیا ہے اور پولس مزید چھان بین کررہی ہے۔
دو بائکوں کی ٹکر: جس وقت ٹریکٹر اور آٹو رکشہ کے درمیان ٹکر ہوئی، اسی وقت ماروکیری کے کیترے بس اسٹاپ کے قریب دو بائکوں کے درمیان بھی خطرناک ٹکر ہوئی، جس کے نتیجے میں تین لوگوں کو شدید چوٹیں آئی ہیں۔ تینوں کو بھٹکل سرکاری اسپتال میں لے جانے کے بعد کنداپور روانہ کیا گیا ہے۔
