ٹورنٹو: وین کے ذریعے روندے جانے سے 10 افراد ہلاک اور 15 زخمی
ٹورنٹو24اپریل ( ایس او نیوز؍آئی این ایس ا نڈیا )کینیڈا کے شہر ٹورنٹو میں پولیس نے بتایا ہے کہ ایک وین ڈرائیور نے شہر کے وسطی علاقے میں لوگوں کے ہجوم پر اپنی وین چڑھا دی جس کے نتیجے میں 10 افراد ہلاک اور 15 زخمی ہو گئے۔ٹورنٹو پولیس سربراہ مارک سونڈرز کے مطابق 25 سالہ ڈرائیور ایلک میناسیان نے "دانستہ طور پر" لوگوں کو وین کے ذریعے روندا جو کہ کرائے پر حاصل کی گئی تھی۔ٹورنٹو پولیس نے اپنی ایک ٹوئیٹ میں بتایا کہ یہ واقعہ مقامی وقت کے مطابق دوپہر1بجے پر پیش آیا جب سفید رنگ کی ایک چھوٹی وین نے شہر کی یونگ اسٹریٹ پر پیدل چلنے والے افراد کو روند ڈالا۔مقامی اخبار ٹورنٹو سَن نے اپنی ویب سائٹ پر ایک شخص کی تصویر جاری کی ہے جس کے بارے میں معلوم ہوا کہ یہ پولیس کی حراست میں لیے جانے والے ڈرائیور کی ہے۔ پولیس نے مذکورہ اخبار کو تصدیق کی ہے کہ گرفتار شخص ہی چھوٹی وین چلا رہا تھا۔