کل سے مودی مسجد میں باقاعدہ نمازوں کاآغاز ، جدید ٹیکنالوجی کی مدد سے صرف دیڑھ ماہ میں مسجد کاڈھانچہ تیار
بنگلورو:24/مئی(ایس او نیوز) شہر کے قلب ٹاسکر ٹاؤن میں واقع تاریخی مودی مسجد میں جمعہ 26 مئی سے باقاعدہ نمازوں کا اہتمام شروع ہوجائے گا۔گزشتہ دو سال سے اس مسجد کو شہید کرکے تعمیر کاکام جاری رہا۔ پچھلے تین چار ماہ سے انتہائی جدید ٹیکنالوجی کے استعمال سے اس مسجد کی دیواروں اور چھت کو کافی تیزی سے تعمیر کیاگیا ہے۔ ماہ رمضان المبارک سے قبل ہی اس مسجد میں نمازوں کے سلسلے کو بحال کرنے کیلئے منتظمین نے تیاری کی تھی، انہی تیاریوں کے عین مطابق مسجد کی نچلی اور پہلی منزل پوری طرح تیار ہوچکی ہے، جس کے سبب منتظمین نے جمعہ کی نماز سے یہاں پابندی کے ساتھ نمازوں کے اہتمام کا فیصلہ کیاہے۔ مودی مسجد کا شمار شہر بنگلور کی چند قدیم مساجد میں کیاجاتا ہے۔بنگلور کے ایک مخیر مودی خاندان نے یہ مسجد تعمیر کروائی تھی، جن کی نسبت سے اس مسجد کانام مودی مسجدرکھ دیا گیاتھا، جو اب بھی برقرار ہے۔کے ای ایف انفرااسٹرکچر کمپنی کی طرف سے اس مسجد کا کنٹراکٹ لے کر دیواریں اور چھت تعمیر کی جارہی ہے۔ 30 دن کے اندر مسجد کی پہلی، نچلی اور میزنین فلور تیار ہوگئے۔ اس کیلئے کے ای ایف انفرااسٹرکچر نے ایک بھاری کرین مسلسل مسجد میں کام کیلئے متعین کردی اور تیار شدہ چھت اور دیوار کے سلاب نصب کرتے ہوئے مسجد کے کام کو انتہائی تیزی سے آگے بڑھایا۔ اس ٹیکنالوجی سے شہر میں تعمیر ہونے والی یہ اپنی نوعیت کی پہلی عمارت ہے۔ ایک دیڑھ ماہ کے عرصہ میں اس قدر عالیشان عمارت کی تکمیل قابل ستائش ہے۔