نئی دہلی ،24؍نومبر (ایس او نیوز؍آئی این ایس انڈیا)اچھے دنوں کالالی پاپ دکھاکرسرکارمیں آئی بی جے پی کی حکومت میں گیس سلینڈر،میٹرواورریل کرائے سے لے کرہرطرف مہنگائی کی مارجاری ہے ۔ملک کے دارالحکومت دہلی میں ٹماٹر کی قیمت نے لوگوں کو غصے سے سرخ کر دیا ہے۔دہلی کے خوردہ بازاروں میں ٹماٹر کی قیمت 80 روپے فی کلو گرام ہو گئی ہے۔آسمان چھوتے ٹماٹر کی قیمت نے سبزی کا ذائقہ بگاڑ دیا ہے۔بتایا جا رہا ہے کہ فراہمی میں کمی کی وجہ سے ٹماٹر کی قیمت مسلسل بڑھ رہی ہے۔ملک کے دیگر علاقوں میں بھی ٹماٹر کی قیمت میں کافی تیزی دیکھنے کو مل رہی ہے۔تجارت کے اعداد و شمار کے مطابق اہم پیداواری ریاست کرناٹک کے بنگلور میں ٹماٹر کا خوردہ دام 45 سے 50 روپے فی کلو گرام تک پہنچ چکا ہے۔میزورم کے ایجل میں 95 سے 100 روپے کلو فروخت ہو رہا ہے۔آزاد پور منڈی کے ٹماٹر تاجر یونین کے صدر اشوک کوشک نے کہاکہ کرناٹک اور مدھیہ پردیش کی حالیہ برسات کی وجہ سے ٹماٹر کی دستیابی کم ہوئی ہے۔انہوں نے کہا کہ مدھیہ پردیش میں ٹماٹر کی 90فیصد فصل خراب ہو چکی ہے۔کسانوں نے دوبارہ بوائی کی ہے۔اس فصل کو آنے میں 15 سے 20 دن لگیں گے۔آزاد پور منڈی میں ٹماٹر 40 سے 50 روپے کلو فروخت ہو رہا ہے۔خوردہ قیمت سے اس سے کہیں زیادہ ہیں۔دہلی کے خوردہ بازاروں میں مختلف مقامات پر ٹماٹر 70 سے 80 روپے کلو فروخت ہو رہا ہے۔ایک سال پہلے اس مدت میں ٹماٹر کی قیمت 30 سے 35 روپے کلو تھی۔کوشک کا کہنا ہے کہ قومی دارالحکومت میں اس وقت ٹماٹر کی فراہمی تقریبا 25 فیصد کم ہے۔دہلی میں چھ بڑی منڈیوں میں روزانہ 225 سے 250 ٹن ٹماٹر کا کاروبار ہوتا ہے۔اس وقت یہ گھٹ کر 170 سے 180 ٹن رہ گیا. تاجروں کا کہنا ہے کہ کچھ ٹماٹر اتراکھنڈ اور چھتیس گڑھ سے بھی آ رہا ہے۔