ایمرجنسی سے بھی بدترہے آج کی صورتحال:ارون شوری
ممبئی:19/نومبر(ایس او نیوز/آئی این ایس انڈیا)سابق مرکزی وزیر ارون شوری نے کہا کہ سابق وزیر اعظم اندرا گاندھی کو ایمرجنسی لگانے کا بہت افسوس تھا لیکن آج کی صورتحال تو 1975-77کے حالات سے بھی زیادہ سنگین ہے۔انہوں نے کہا کہ اگر اپوزیشن متحد ہو جائے اور ہر سیٹ پر بی جے پی امیدوارکے مقابلے اپنا ایک امیدوار اتارنے کے اصول پر عمل کرے تو 2019لوک سبھا انتخابات میں وزیر اعظم نریندر مودی کے وجے رتھ کو روکاجاسکتاہے۔شوری یہاں ٹاٹا لٹریچر فیسٹیول میں’ عدالتی نظام کے اندر خطرہ ‘پرمنعقد ہونے والے اجلاس سے خطاب کررہے تھے ۔انہوں نے کہاکہ 1975میں ایک بہتر اور مستحکم اپوزیشن تھا لیکن آج اپوزیشن منتشرہے،میں یہ کہہ سکتا ہوں کہ اندرا اور نریندر مودی کے درمیان فرق یہی ہے کہ اندرا کو اپنے کئے پر افسوس تھا۔شوری نے کہا کہ آج کوئی افسوس نہیں ہے۔اندرا کے معاملے میں میں محسوس کرتا ہوں کہ اگرچہ انہوں نے تقریبا 175000لوگوں کو جیل میں ڈالا ، اس حقیقت کے باوجود وہ حد سے واقف تھیں،کہ اس سے آگے نہیں جاناہے،آج حد کولے کر کوئی سوچ یا سمجھ نہیں ہے۔
