آج راہول گاندھی کے ہاتھوں 101 اندرا کینٹینوں کا افتتاح
بنگلورو:15/اگست(ایس او نیوز) کم قیمت پر عوام کو صبح ، دوپہر اور شام کا کھانا مہیا کرانے حکومت کی طرف سے بی بی ایم پی کے ذریعہ قائم کی جارہی اندرا کینٹین کا کل افتتاح عمل میں آئے گا۔ شہر میں بیک وقت 101 اندرا کینٹین کھولے جائیں گے۔ کانگریس نائب صدر راہول گاندھی کل صبح ساڑھے گیارہ بجے جئے نگر وارڈ میں آنے والے کنکنا پالیہ مین روڈ پر موجود اندرا کینٹین کا افتتاح کریں گے اور ساڑھے بارہ بجے نیشنل کالج میدان میں ہونے والے جلسۂ عام سے خطاب کریں گے۔ بی بی ایم پی کی طرف سے شہر کے ہر وارڈ میں 28.5 لاکھ روپیوں کی لاگت سے اندرا کینٹین تیار کئے گئے ہیں۔ پہلے مرحلے میں کل 101اندرا کینٹین کھولے جارہے ہیں۔ اندرا کینٹین میں کھانے کی فراہمی کیلئے 27 خصوصی باورچی خانے تیار کئے گئے ہیں جہاں کھانے کی فراہمی کا کنٹراکٹ حاصل کرنے والی کمپنی کی طرف سے بیک وقت تمام کینٹینوں میں کھانا مہیا کرایا جائے گا۔ بی بی ایم پی کمشنر منجوناتھ پرساد نے بتایاکہ اندرا کینٹین کے متعلق معلومات حاصل کرنے کیلئے ایک موبائل ایپ بھی تیار کیاگیا ہے، اس ایپ کی مدد سے پانچ قریبی اندرا کینٹینوں کی نشاندہی کی جاسکتی ہے، اور ساتھ ہی ان کینٹینوں میں روزانہ دستیاب ہونے والے کھانے کی تفصیلات بھی حاصل کی جاسکیں گی۔ ایک اندرا کینٹین میں سات افراد پر مشتمل عملہ صبح ساڑھے سات بجے سے کام کرے گا۔کینٹین میں صبح کا ناشتہ ساڑھے سات بجے سے ساڑھے دس بجے تک ، دوپہر کا کھانا ساڑھے بارہ بجے سے ڈھائی بجے تک اور رات کا کھانا ساڑھے سات بجے سے ساڑھے نو بجے تک مہیا کرایا جائے گا۔ ناشتہ کیلئے پانچ روپے اور کھانے کیلئے دس روپے لئے جائیں گے ۔ ہر کینٹین میں کھانے کے معیار کی نگرانی کیلئے خصوصی ہیلتھ افسران کا تقرر کیا گیا ہے۔ تمام کینٹینوں میں نگرانی کیلئے سی سی ٹی وی کیمرے لگائے گئے ہیں۔ کل ہونے والی تقریب میں وزیر اعلیٰ سدرامیا ، اے آئی سی سی جنرل سکریٹری وینو گوپال، کے پی سی سی صدر ڈاکٹر جی پرمیشور، میئر پدماوتی ، بنگلور کے وزراء جناب روشن بیگ ، کے جے جارج ، رام لنگا ریڈی کے پی سی سی کارگذار صدر دنیش گنڈو راؤ ، ایس آر پاٹل، شہر کے تمام اراکین اسمبلی ، کارپوریٹرس وغیرہ شریک رہیں گے۔