مرتے دم تک مسلمانوں کے آئینی حقوق کا تحفظ کروں گا۔سدارامیا سابق وزیراعلیٰ کو مسلم وفد کی تہنیت۔مسلمان اقتدار کے پیچھے نہیں بھاگتے: مولانا مزمل
بنگلورو،11؍نومبر (ایس او نیوز) تین سال قبل سابق وزیراعلیٰ سدارامیا کے دور اقتدار میں سرکاری سطح پر ٹیپو جینتی منانے کا سلسلہ شروع ہوا تھا۔ دراصل جنگ آزادی کے اولین مجاہدحضرت ٹیپو سلطان شہیدؒ کے چاہنے والوں کا یہ دیرینہ مطالبہ تھا کہ دیگر عظیم شخصیتوں کی طرح حضرت ٹیپو سلطانؒ کا جنم دن بھی سرکاری سطح پر منایا جائے ۔2013 میں ریاستی اسمبلی کے لئے ہوئے انتخابات کے دوران کانگریس نے وعدہ بھی کیا تھا کہ ان کی پارٹی اقتدار پر آئی تو ٹیپو جینتی سرکاری سطح پر منائی جائے گی۔ اس وعدہ کو پورا کرتے ہوئے 2015 ء میں سدارامیا حکومت نے سرکاری سطح پر ٹیپو جینتی منانے کا سلسلہ شروع کیا۔ حالانکہ اس وقت بھی بشمول بی جے پی چند کٹر پسند ہندو تنظیموں نے اس کی پرزور مخالفت کی تھی، اس کی پروا کئے بغیر سدارامیا نے یہ سرکیولر جاری کروایا کہ ریاست کے تمام ضلعی اور تعلقہ ہیڈکوارٹرس میں ٹیپو جینتی منایا جانا چاہئے ۔ریاست کی راجدھانی بنگلور کے ودھان سودھا کے بینکویٹ ہال میں پہلی بار10نومبر2015 کو شاندار پیمانے پر ٹیپو جینتی منائی گئی۔ سرکاری سطح پر ٹیپو جینتی منانے کی شروعات کرنے والے سدارامیا اس وقت اقتدار پر نہیں ہیں ۔ان کے اس کارنامہ کا اعتراف کرتے ہوئے آج صبح مولانا محمد مزمل احمد رشادی اور ریاستی وزیر برائے خوراک امور اقلیت اور اوقاف ضمیراحمد خان کی قیادت میں ایک وفد نے سدارامیا کی رہائش گاہ پہنچ کران کی حوصلہ افزائی کی اور ان کی شال وگلپوشی کی۔ انہیں ٹیپو سلطان کا روایتی پیٹھا پہنایا اورانہیں ایک تلوار کا تحفہ بھی پیش کیا۔اس موقع پر مولانا محمد مزمل نے تین سال قبل سدارامیا کے سرکاری سطح پر ٹیپو جینتی شروع کرنے پر مسلمانان کرناٹک کی جانب سے ان کا شکریہ ادا کرتے ہوئے کہا کہ مسلمان احسان فراموش نہیں جو اپنے محسنوں کوبھول جائیں ۔یہ بھی کہا کہ مسلمان اقتدار کے پیچھے بھی نہیں بھاگتے ۔جو قائد مسلمانوں کے سچے ہمدرد ہیں ان کی قدر ہمیشہ مسلمانوں کے دل میں رہتی ہے۔یہ مسلمانوں نے آج ثابت بھی کردیا ہے۔ مسلمانوں کے نزدیک اقتدار نہیں بلکہ قائد کی قابلیت اور ان کی خدمات کی اہمیت ہے ۔ اس موقع پر جذباتی ہوتے ہوئے سدارامیا نے ریاست کے تمام مسلمانوں کا شکریہ ادا کیا اور کہا کہ وہ مرتے دم تک مسلمانوں کے آئینی حقوق کا تحفظ کریں گے اور ہر سطح پر ان کی ترجمانی کریں گے ۔اقتدار ان کے لئے اہم نہیں ، اقتدار آتااور جاتا رہتا ہے ۔ انسانیت اور اخلاق اہم ہیں ۔انہیں رہنمائی فراہم کرنے پر ضمیراحمد خان نے بھی اس موقع پر سدارامیا کا شکریہ ادا کیا۔