ڈانڈیلی میں پارک کیے ہوئے ٹپّر سے دو ٹائر ہوگئے چوری
ڈانڈیلی 27؍دسمبر (ایس او نیوز) ڈانڈیلی شہر میں آج کل پھر سے چوری کی وارداتوں کا سلسلہ چل پڑا ہے۔تازہ واردات جے این روڈ پیش آئی ہے جہاں پارک کیے گئے ٹپّر کے پچھلے 2ٹائر چرا لیے گئے ہیں۔
پتہ چلاہے کہ چرائے گئے دونوں ٹائر بالکل نئے تھے اور حال میں گاڑی میں لگوائے گئے تھے۔ان دونوں ٹائروں کی مالیت تقریباً 55سے60ہزار روپے بتائی جاتی ہے۔اس سلسلے میں ٹپّر کے مالک آر ڈی جنّو نے شہری پولیس تھانے میں شکایت درج کروائی ہے۔یاد رہے کہ گزشتہ ایک مہینے قبل اسی سڑک پر سریتا سویٹ مارٹ کا تالا توڑ کر چوری کی واردات انجام دی گئی تھی۔عوام کا کہنا ہے کہ پولیس ان معاملات کو سنجیدگی سے لے اور مکمل تحقیقات کرتے ہوئے ملزمین کو جلد از جلد گرفتار کرلے تا کہ چوریوں کا یہ سلسلہ رک جائے اور عوام راحت کی سانس لے سکیں۔