بنگلورو:9 ؍دسمبر(ایس او نیوز)گزشتہ سال خواتین کے ساتھ اجتماعی بدسلوکی جیسے واقعات کو اس مرتبہ نئے سال کے موقع پر رونما ہونے سے روکنے کے لئے شہر کی پولیس سخت حفاظتی اقدامات کررہی ہے، اس سلسلے میں پولیس کمشنر سنیل کمار نے بریگیڈ روڈ، ایم جی روڈ اور چرچ اسٹریٹ جیسے مقامات پر جہاں سال نو کے استقبال کے لئے کثیر تعداد میں لوگ جمع ہوتے ہیں، حفاظتی انتظامات کا جائزہ لینے کے لئے گزشتہ ہفتے دو اجلاس طلب کئے تھے، ڈپٹی کمشنر آف پولیس(سنٹرل) چندرگپتا کے مطابق بڑے پیمانے پر حفاظتی انتظامات کئے جارہے ہیں، انہوں نے بتایا کہ ہجوم پر نظر رکھنے کے لئے افزود پولیس عملہ کی تعیناتی کا منصوبہ بنایا گیا ہے، پولیس افسران اس بات کو یقینی بنائیں گے کہ کسی ایک مقام پر لوگ اکٹھا نہ ہوں، بریگیڈ روڈ پر آنے جانے کے لئے داخلہ اور نکاسی کے مقام پر ہجوم کو قابو میں رکھنے کے لئے پولیس دستہ نگرانی کرے گا، ہجوم پر نظر رکھنے کے لئے واچ ٹاور بنائے جائیں گے، جہاں سے مسلح پولیس لوگوں پر نظر رکھے گی، ڈرون کیمرہ کے ذریعہ لوگوں کی آمد ورفت کی ویڈیو عکس بندی کے علاوہ 250 سی سی ٹی ویجزوقتی کیمرے نصب کئے جائیں گے، انفنٹری روڈ پولیس کمشنرکے دفتر میں بنے مرکز سے ویڈیو عکس بندی کی نگرانی کی جائے گی، اور کسی بھی مشتبہ حرکت پر فوراً علاقہ میں موجود پولیس افسران کو مطلع کیا جائے گا۔