ہانگل میں کار اور بس کے درمیان ہوئی ٹکر میں ایک ہی خاندان کے تین لوگ جاں بحق؛ دو شدید زخمی
ہاویری 11/مارچ (ایس او نیوز) ضلع ہاویری کے ہانگل تعلقہ کے گیجی ہلّی میں ہوئے ایک بدترین سڑک حادثہ میں ایک ہی خاندان کے تین افراد جاں بحق ہوگئے جبکہ دیگردو شدید زخمی ہوگئے۔ حادثہ اتوار کو پیش آیا۔
ذرائع سے ملی اطلاع کے مطابق یہ سبھی لوگ ایک کار پر ہاویری کے بیادگی تعلقہ سے ہانگل میں کسی پروگرام میں شریک ہونے جارہے تھے کہ گیجی ہلّی نامی مقام پر ایک تیز رفتار بس ان کی کار سے ٹکراگئی۔ ٹکراتنی شدید تھی کہ کار پر سوار دو خواتین باہر سڑک پر جاگریں اور وہیں دم توڑ دیا، جبکہ ایک شخص نے اسپتال لے جانے کے دوران دم توڑ دیا۔بس کی ٹکر سے کار کے پرخچے اُڑ گئے ہیں۔
ٹکر مارنے والی پرائیویٹ بس ہانگل سے داونگیرے ضلع کے چینّاگیری جارہی تھی، ٹکر سے بس پر سوار کسی بھی مسافر کو چوٹ لگنے کی کوئی اطلاع نہیں ہے۔
کار پر سوار سبھی لوگ کنولّی کے ایک ہی خاندان کے بتائے گئے ہیں جن کی شناخت شاہینہ بانو رحمان (37) ان کی دُختر مُسکان رحمان (18) اور مسکان کے والد عبدالقادر رحمان (48) کی حیثیت سے کی گئی ہے۔ بتایا گیا ہے کہ عبدالقادر کو نہایت زخمی حالت میں ہاویری اسپتال میں ابتدائی طبی امداد کے بعد ہبلی لے جایا جارہا تھا ، مگر وہ راستے میں ہی زخموں کی تاب نہ لاکر چل بسے۔ زخمیوں کی شناخت عبدالقادر رحمان کے فرزند محمد دانش رحمان (17) اور اشفاق رحمان (22) کی حیثیت سے کی گئی ہے۔ دونوں کو شدید چوٹیں آئی ہیں اور انہیں ہانگل تعلقہ اسپتال میں ابتدائی طبی امداد فراہم کرنے کے بعد زائد علاج کے لئے ہبلی کے کیمس اسپتال روانہ کیا گیا ہے۔
ہانگل پولس تھانہ میں کیس درج کیا گیا ہے۔
