بھینسوں کو اُڈپی لے جانے کے دوران سنگھ پریوار کے کارکنوں نے پکڑوائی جانوروں کی لاری؛ تین گرفتار
بھٹکل 15/مئی (ایس او نیوز) بھینسوں کی ایک لاری کو جو بیلگام کے بیل ہونگل سے اُڈپی جارہی تھی، شمس الدین سرکل پر ہندو شدت پسند تنظیم کے کارکنوں نے روک کر پولس کے حوالے کرنے کی واردات اتوار کو پیش آئی ہے۔ ذرائع سے ملی اطلاع کے مطابق لاری پر 15 بھینسے تھے، جسے اُڈپی لے جایا جارہا تھا، مگر بھٹکل سرکل پر شدت پسند تنظیم کے کچھ کارکنوں نے لاری کو زبردستی روک کر اُس کی تلاشی لیتے ہوئے مقامی پولس کو خبر کی ، جنہوں نے لاری کو اپنی تحویل میں لیتے ہوئے لاری پر سوار تین لوگوں کو گرفتار کرلیا۔
گرفتار شدگان کی شناخت بیل ہونگل کے موگپّا ماٹولّی، ملّن گوڈا رامن گوڈا ملّی کنچ اور سدپّا شیوپّا سونگار کی حیثیت سے کی گئی ہے۔ پولس نے بتایا کہ ان لوگوں کے پاس جانوروں کو ٹرانسپورٹ کرنے کے تعلق سے کوئی کاغذات اور اجازت نامہ وغیرہ نہیں تھا۔ پولس نے یہ بھی بتایا کہ ان جانوروں کو ظالمانہ طریقے سے لاری پر سوار کرکے لے جایا جارہا تھا۔
پولس نے بتایا کہ اس تعلق سے موڈ بھٹکل کے رہنے والے رگھویندر رام چندرا نائک کی شکایت پر معاملہ درج کرلیا گیا ہے اورپولس نے لاری سمیت جانوروں کو اپنی تحویل میں لیتے ہوئے تینوں لوگوں کو عدالت کے روبرو پیش کرکے جوڈیشیل کسٹڈی میں بھیج دیا ہے۔