ریاض،31جولائی(ایس او نیوز/آئی این ایس انڈیا): رپورٹوں کے مطابق سعودی عرب میں خواتین کے لیے ولی کے قانون کے خلاف مہم چلانے والی کارکن کو جیل میں ایک سو دن قید رکھنے کے بعد رہا کر دیا گیا ہے۔ولی کے قانون کے تحت سعودی خواتین کو پاسپورٹ حاصل کرنے، بیرونِ ملک سفر کرنے، شادی کرنے یا پھر جیل سے نکلتے وقت کسی قریبی مرد رشتے دار کی ضرورت ہوتی ہے۔
العتیبی کو سوشل میڈیا پر بہت سے لوگ فالو کرتے ہیں۔ انھوں نے سوشل میڈیا پر #IAmMyOwnGuardianیعنی میں اپنی ولی خود ہوں، کے ہیش ٹیگ سے ایک مہم چلائی تھی اور شاہ سلمان کو خطوط بھیجے تھے۔تاہم ان کے اپنے گھر کے مردوں نے اس کی مخالفت کی تھی۔ اس کے بعد مریم گھر چھوڑ کر ریاض چلی گئیں تو ان کے والد نے ولی کے قانون کے تحت ان کے خلاف پولیس میں رپٹ درج کروا دی۔پولیس نے انھیں گرفتار کر کے جیل میں ڈال دیا۔گرفتاری سے تھوڑی دیر قبل مریم نے ٹویٹ کی تھی کہ میں دوبارہ جہنم میں نہیں جانا چاہتی۔اپریل میں شاہ سلمان نے سرکاری اداروں کو ہدایات دی تھیں کہ خواتین کو سرکاری سہولیات حاصل کرتے وقت ولی کی شرط ختم کر دی جائے۔