چھتیس گڑھ کے لوگوں کی آنکھوں میں دھول جھونک رہی ہے کانگریس :مودی
مہاسامنڈ:18/نومبر(ایس او نیوز/آئی این ایس انڈیا)کانگریس پر چھتیس گڑھ کے لوگوں کی آنکھوں میں دھول جھونکنے اور جھوٹے وعدے کرنے کا الزام لگاتے ہوئے وزیر اعظم نریندر مودی نے اتوار کو کہا کہ کانگریس کے ایک ہی خاندان کی چار نسلوں نے ملک پر حکومت کی، جس کا انہیں تو فائدہ ملا لیکن ملک کو کوئی فائدہ نہیں ہوا۔ چھتیس گڑھ کے مہاس منڈ میں ایک جلسے سے خطاب کرتے ہوئے وزیر اعظم نے زور دے کر کہاکہ کانگریس چھتیس گڑھ کے بھلے لوگوں کی آنکھوں میں دھول جھونک رہی ہے اور جھوٹے وعدے کر رہی ہے۔انہوں نے سوال کیاکہ جنہوں نے بینکوں کو لوٹا اور لٹوایا ہے، کیا ان سے پائی پائی کاحساب لینا جرم ہے؟۔ مودی نے کہا کہ جو لوٹ مارنے کے بعد ملک سے بھاگ گئے ہیں، دنیا میں کہیں بھی اپنی جائیداد رکھتے ہیں، حکومت اسے اسے ضبط کرنے کاقانون لائی ہے۔کانگریس پرنشانہ لگاتے ہوئے انہوں نے کہا کہ کرناٹک میں انہوں نے (کانگریس)نے کہا تھا کہ کسان کا قرض معاف کریں گے،ان کی حکومت کو ایک سال ہو گئے لیکن خبریں ہیں کہ ان لوگوں کے نام پر سینکڑوں وارنٹ جاری کئے جا رہے ہیں جن پر قرض تھے۔
مودی نے الزام لگایا کہ 2008میں کسانوں کاقرض معاف کرنے کی یو پی اے حکومت کی منصوبہ بندی سے کسانوں کو نہیں، بلکہ ایسے 8 فیصد لوگوں کو فائدہ ہوا جو اس کے مستحق ہی نہیں۔ریاست میں بی جے پی کو ایک بار پھر مینڈیٹ دینے کی اپیل کرتے ہوئے وزیر اعظم نے کہا کہ رمن سنگھ کو سچے معنی میں کام کرنے کا موقع صرف گزشتہ ساڑھے چار سال میں ہی ملا کیونکہ اس سے پہلے دہلی میں ریموٹ کنٹرول سے چلنے والی حکومت بیٹھی تھی۔انہوں نے الزام لگایا ہے کہ پچھلی یوپی اے کی حکومت نے چھتیس گڑھ پر کوئی توجہ نہیں دی۔چھتیس گڑھ کے لئے پہلا موقع آ یا جب دہلی میں بی جے پی حکومت بنی تھی۔مودی نے کہا کہ سیتارام کیسریایک دلت تھے اور کانگریس کے صدر کے طور پر انہیں پانچ سالہ مدت مکمل کرنے نہیں دیاگیا، لیکن سونیا گاندھی کے لئے راستے بنانے کی خاطرانہیں ہٹا دیا گیا ۔انہوں نے دعوی کیا کہ بیماروریاست کے باوجود رمن سنگھ نے چھتیس گڑھ ترقی کی نئی بلندیوں پرپہنچایا۔انہوں نے کانگریس پر الزام لگاتے ہوئے کہا کہ انہیں صرف غلط اورجھوٹے وعدے، دھوکہ دہی اور گمراہ کرنے کے علاوہ کچھ نہیں آتا۔مودی نے کہا کہ اس کی حکومت نے کسان کو مضبوط بنا یا ہے ۔انہوں نے کہا کہ کانگریس نے پچاس سال تک جھوٹ بول کر ملک کو گمراہ کیا ہے اور اب انہیں سمجھنا چاہئے کہ ملک کے لوگوں نے آپ کو 440سے 40پرلاکھڑاکردیاہے۔