واٹسن کو آئی پی ایل سیزن میں شائقین کا اعتماد بحال نہ کرپانے پر افسوس۔آئندہ بہترکارکردگی کا وعدہ
نئی دہلی:10؍مئی (یو این آئی) رائل چیلنجرز بنگلور کے اسٹار آل راؤنڈر شین واٹسن نے موجودہ آئی پی ایل سیزن میں اپنی اور ٹیم کی انتہائی خراب کارکردگی پر مایوسی ظاہر کرتے ہوئے کہا یہ ان کا بدترین آئی پی ایل سیزن ہے ۔ انہوں نے کہا کہ اگرچہ وہ ٹیم کے آخری لیگ میچ میں اتوار کو دہلی ڈیر ڈیولس کے خلاف ہونے والے میچ میں جیت کے لئے سب کچھ جھونک دیں گے تاکہ ٹیم ٹورنمنٹ سے کسی عزت کے ساتھ رخصت ہوسکے ۔ اسٹار بلے بازوں ویراٹ کوہلی، دھماکہ خیز بلے باز کرس گیل اور اے بی ڈویلیئرز کی موجودگی کے باوجود بنگلور ٹیم کی اس سیشن میں کارکردگی انتہائی مایوس کن رہی ہے اور وہ اپنے13؍میچوں میں صرف دو میں ہی کامیابی حاصل کر سکی ہے۔بنگلور کی خراب کارکردگی کا اسی سے اندازہ لگا سکتے ہیں کہ اس نے اپنے 6؍ گھریلو میچوں میں سے5؍ گنوائے ہیں اور ٹورنمنٹ میں اپنا سب سے کم اسکور 49؍رن بھی بنایا ہے ۔ واٹسن کی کارکردگی بھی انتہائی ناقص رہی اور انہوں نے7؍ اننگز میں کل67؍رن ہی بنائے ہیں۔واٹسن نے مایوسی کا اظہار کرتے ہوئے کہا’’یہ ناقابل اعتماد ہے کہ جس ٹیم نے گزشتہ2؍ برسوں میں شاندار کارکردگی کا مظاہرہ کیا تھا اس کے کھیل میں اچانک اتنی کمی کس طرح آ گئی۔گزشتہ برسوں کی بہترین کارکردگی کی بنیاد پر ہم نے جو ناظرین کا اعتماد جیتا تھا وہ اس بار چکنا چور ہو گیا۔ حامیوں کی بے پناہ حمایت کے باوجود ایسی ناقص کارکردگی انتہائی مایوس کن ہے۔ یہ پوچھے جانے پر کہ کیا آئی پی ایل سے پہلے بہت دنوں تک کرکٹ نہیں کھیلنے سے ان کی کارکردگی متاثر ہوئی ہے ، واٹسن نے کہا ’’پچھلے کچھ عرصے سے میں میدان سے دور تھا اور مشق نہیں کر سکا تھا۔ یہ خراب کارکردگی کا ایک سبب بن سکتا ہے۔ میں نے ہمیشہ اپنی سو فیصد کاکردگی پیش کرنے کی کوشش کی ہے۔ لیکن اپنی اور ٹیم کی خراب کارکردگی سے میں واقعی دکھی ہوں۔ یہ میرا بدترین آئی پی ایل سیشن ہے۔ ٹیم کے دیگر کھلاڑی بھی اپنی کارکردگی سے مایوس ہیں لیکن یہ کھیل کا حصہ ہے اور تمام آگے کے ٹورنمنٹوں میں پھر واپسی کی کوشش کریں گے۔
