گنگولی میں بائک کو آگ لگانے کی تیسری واردات۔اس بار ملزم ایک گھنٹے کے اندر گرفتار
گنگولی13؍جنوری (ایس او نیوز) گنگولی میں ایک ہفتے کے اندرتیسری مرتبہ گھرو ں کے سامنے پارک کی گئی موٹر گاڑیوں کو آگ لگانے کی واردات پیش آئی ہے، جس کے بارے میں سمجھا جاتا ہے کہ یہ مقامی طور پر فرقہ وارانہ کشیدگی پید اکرنے کی نیت سے انجام دی جارہی ہے۔ لیکن اس مرتبہ عوام کے چوکنا رہنے کی وجہ سے پولیس نے بھی مستعدی سے کام کیا اور ایک گھنٹے کے اندرملزم گرو راج کھاروی کو گرفتار کرلیا ، جس نے پولس کے مطابق اپنا جرم قبول کیا ہے۔
بتایا جاتا ہے کہ اس مرتبہ بائک کو آگ لگانے کا واقعہ تکیہ محلے میں واقع محمد نعیم کے گھر کے سامنے پیش آیا۔ رات کے ایک بجے کے قریب محمد نعیم کے گھر کے سامنے پارک کی گئی ایکٹیوا بائک میں آگ بھڑکی تو اڑوس پڑوس کے لوگ چوکنا ہوگئے۔ ایک شخص نے گرو راج کھاروی کو موقع پر سے فرار ہوتے ہوئے دیکھ لیا تھا اس لئے محلے والوں نے پولیس کو اس کی اطلاع دی۔ انچارج پولیس سب انسپکٹر سوُبنّا اور دیگر پولیس اہلکاروں نے مستعدی سے کام کرتے ہوئے سیدھے گروراج کے گھر پر دستک دی ۔ اس وقت جرم انجام دے کر گھر پہنچنے والاگروراج آرام کی نیند سورہا تھا۔ پولیس کو اپنے دروازے پر دیکھ کراس نے گھر سے فرار ہونے کی کوشش کی ، مگر پولیس والے اسے گھیر کر پولیس اسٹیشن تک لانے میں کامیاب ہوگئے۔ پولیس کے بیان کے مطابق گروراج کے جرم قبول کرنے پر اسے گرفتار کرلیا گیا ہے۔ اس سے پہلے بائکس کو آگ لگانے کی جو وارداتیں انجام دی گئی تھیں اس میں گروراج کے ملوث ہونے کے بارے میں بھی تحقیقات کی جارہی ہے۔اس کے علاوہ اس بات کی بھی تفتیش کی جارہی ہے کہ بائک کو آگ لگانے کی اس واردات کوانجام دینے کے لئے کسی اور نے گروراج کو اکسایا تو نہیں تھا۔
