بنگلور،16؍فروری(ایس اونیوز) شہر کے یلہنکا ایر بیس میں آج تیسرے دن بھی ایرو انڈیا ایر شو کے دوران طیاروں کی اڑانوں اور کرتبوں نے ناظرین کو دم بخودکرنے کا سلسلہ جاری رکھا۔ ایچ اے ایل کی طرف سے تیار دھرو ، ردرا اور سیتا ہلکے ہیلی کاپٹرس نے اپنے مختلف کمالات سے ایر شو کی رونق میں اضافہ کیا۔ ملک اور بیرون ممالک کے شہری اور جنگی طیاروں نے بنگلور کی فضاؤں میں اپنے کمالات پیش کئے۔ ان کمالات کو ہر دیکھنے والے نے اپنے موبائل کیمروں میں قید کیا اور اسے اپنی یادگار بنالے گیا۔ بیرون ملکی ریڈ بل ٹیم نے آج اپنے کمالات کو غیر معمولی بلندیوں پر پہنچاتے ہوئے نہ صرف کرتبوں کے ساتھ اڑان بھری، بلکہ اڑتے ہوئے طیاروں پر دو لڑکیوں نے رقص کرکے ناظرین کو حیرت میں ڈال دیا۔ ایک دوسرے کے مقابل سمت سے تیز رفتار طیاروں نے اس طرح اڑانیں بھریں کہ دونوں ہی آپس میں ٹکرانے والی ہیں ، لیکن پلک جھپکتے ہی پائلٹوں نے اپنی مہارت کا ثبوت دیتے ہوئے طیاروں کا رخ موڑ لیا۔ ملک کے اپنے اولین جنگی طیارہ تیجس نے بھی اپنی اڑان کے ذریعہ ملک کی فضائی طاقت کا مظاہرہ کیا۔