حجاج کرام کے تیسرے قافلہ کی بروقت بنگلورو آمد
بنگلورو،24/ستمبر(ایس او نیوز) بنگلورو میں سعادت حج سے سرفراز ہوکر حجاج کرام کے واپس لوٹنے کا سلسلہ جاری ہے۔ وقت مقررہ پر فلائٹ کی آمد کے سبب حجاج کرام آج صبح کی اولین ساعتوں میں اطمینان کے ساتھ اپنے گھر روانہ ہوگئے۔ پہلی دو فلائٹوں میں تاخیر کی وجہ سے وزیر شہری ترقیات وحج جناب روشن بیگ نے ہندوستانی قونصل برائے سعودی عرب سے کل رابطہ کیا اور اس سلسلے میں وجہ دریافت کی تو پتہ چلا کہ مدینہ منورہ ایرپورٹ پر لگیج کنویئر بلٹ میں خرابی کے سبب فلائٹوں کی آمد میں تاخیر ہوئی، تاہم کل مدینہ منورہ ایرپورٹ میں کنویئر بلٹ کی بروقت مرمت کردی گئی، جس کے سبب حجاج کرام کا تیسرا طیارہ بنگلور کیلئے بروقت روانہ ہوا اور رات سوا بارہ بجے وقت مقررہ پر اس کی بنگلور انٹرنیشنل ایرپورٹ پر آمد ہوئی۔ جناب روشن بیگ نے بذات خود حجاج کرام کا استقبال کیا اور ان سے ریاست کی خوش حالی اور امن وامان کیلئے خصوصی دعاؤں کی گذارش کی۔ بڑی تعداد میں رضاکاروں کی مدد سے حاجیوں کو اپنا لگیج جمع کرنے اور انہیں باہر تک لے جانے میں مدد دی گئی۔ امیگریشن ، کسٹمس اور دیگر قانونی تقاضوں کی تکمیل کے بعد جلد ہی حجاج حج ٹرمینل سے باہر نکل گئے جہاں پر ان کا استقبال کرنے رشتہ داروں کا جم غفیر امڈ پڑا تھا۔ حج ٹرمینل پر حجاج کرام کی آمد کے بعد خصوصی دعاؤں کا اہتمام کیاگیا اور ملک میں امن وامان ، خوشحالی ، یکجہتی اور خاص طور پر ملت اسلامیہ کے مسائل کی یکسوئی کیلئے بارگاہ الہٰی میں دعا کی گئی۔ جناب روشن بیگ کے ساتھ ریاستی حج کمیٹی کے اراکین جے سید ثناء اﷲ ، ایم ایس ارشد اور بڑی تعداد میں رضاکاروں کی ٹیم حاجیوں کی خدمت میں صبح کی اولین ساعتوں تک لگی رہی۔ بروقت حج فلائٹ کی آمد پر اپنی مسرت کا اظہار کرتے ہوئے جناب روشن بیگ نے بتایاکہ اس کے بعد بقیہ تمام گیارہ فلائٹوں کی بھی بروقت آمد متوقع ہے۔ فلائٹوں کی آمد کا سلسلہ 5؍ اکتوبر تک جاری رہے گا۔ انہوں نے کہاکہ اس بار باعث اطمینان بات یہ ہے کہ حج بیت اﷲ کی ادائیگی پرسکون گزری ہے اور مرکزی وزارت اقلیتی امور اور سعودی عرب کی وزارت حج کی طرف سے حجاج کرام کیلئے کئے گئے انتظامات کو جناب روشن بیگ نے اطمینان بخش قرار دیتے ہوئے کہاکہ مکتہ المکرمہ میں گرین اور عزیزیہ زمرے میں حجاج کیلئے رہائش اچھی عمارتوں میں رہی ، خاص طور پر عزیزیہ میں عالیشان عمارتیں حجاج کے قیام کیلئے مہیا کرائی گئی تھیں، اسی طرح مدینہ منورہ میں بھی حجاج کی رہائش کا انتظام کافی اچھا رہا۔ مجموعی طور پر امسال کا سفر حج یادگار اور پرسکون رہا۔انہوں نے کہاکہ سفر حج کو کامیاب بنانے کیلئے بنگلور میں عازمین حج کی روانگی سے لے کرحجاج کرام کی واپسی تک رضاکاروں کی ٹیمیں جو بے لوث خدمات انجام دیتی ہیں اس کی وجہ سے بنگلور کے حج انتظامات کو سارے ملک کیلئے ایک مثال قرار دیا جاتا رہا ہے اور انہیں اس بات پر فخر ہے کہ ان کے ساتھ ایسے بے لوث رضاکاروں کی ٹیم کام کرتی ہے۔