اُڈپی میں چوری کی زبردست واردات؛ مالک مکان کا اسپتال میں داخل ہونا مہنگا پڑ گیا؛ لاکھوں مالیت کے سونے اور چاندی کے زیورات پر ہاتھ صاف
اڈپی، 20؍فروری (ایس او نیوز) اُڈپی میں پیش آئی چوری کی ایک زبردست واردات میں لٹیروں نے گھر کا دروازہ توڑ کر لاکھوں روپئے مالیت کے سونے اور چاندی کے زیورات سمیت نایاب سکوں پر بھی ہاتھ صاف کرلیا گیا۔ واردات اُس وقت پیش آئی جب مالک مکان علاج کی غرض سے اسپتال میں داخل تھا۔
ذرائع سے ملی اطلاع کے مطابق سوریا کمار شیٹھ سونے اور چاندی کے قدیم اورنا یاب سکّے جمع کرنے کا شوقین ہے اور سونے کے زیورات کاکاروبار بھی کرتاہے۔ تقریباً 15 دن پہلے جب وہ بیمار ہوگیا تو تب سے علاج کے لئے اسے اسپتال میں داخل کیا گیا تھا۔سوریا کمار کی تینوں بیٹیوں کی شادی ہوچکی ہے او ر وہ اپنے شوہروں کے ساتھ رہتی ہیں۔اس کا ایک اکیلا بیٹا ہے جو اس کی دیکھ بھال کے لئے اسپتال میں رہاکرتا تھا اوروہ دوچار دن میں ایک بار گھر پر آیا جایا کرتاتھا۔اس طرح اکثر اوقات گھر مقفل رہتا تھا۔ اتوار کی صبح کو جب سوریا کمار کا بیٹا گھر پر آیا تو دیکھاکہ داخلی دروازہ ٹوٹا ہواتھا۔اندر جاکر معائنہ کرنے پر الماریاں اور تجوری وغیرہ توڑ پھوڑ کر اس میں موجود قدیم سکے اور زیورات لوٹے جانے کا منظر سامنے آیا۔قدیم اور نایاب سکے جس البم میں تھے اس میں سے چوروں نے صرف سونے کے سکے اڑالیے اور چاندی کے سکے یوں ہی چھوڑدئے ہیں۔پولیس مسروقہ مال کی قیمت کا حساب لگانے میں جٹی ہوئی ہے مگر ابتدائی اندازے کےمطابق لاکھوں روپیوں کا نقصان ہوا ہے۔
بتایاجاتا ہے کہ سوریا کمارکے بیٹے کے کمرے میں چار الماریوں میں قیمتی سکے اور زیورات رکھے گئے تھے۔ ہر ایک الماری کو قفل لگانے کے بعد اس کی چابی دوسری الماری میں رکھ دی گئی تھی۔ اور ایک اہم الماری کی چابی ایک ٹیبل کے دراز میں رکھی گئی تھی۔چوروں نے پہلے وہی چابی ڈھونڈ نکالی پھر ہر الماری سے دوسری الماریوں کی چابی تلاش کرلینے میں کامیاب رہے۔اس سے سمجھاجارہا ہے کہ لوٹ کی اس واردات میں الماریوں کو مقفل کرنے اور چابیوں کو چھپائے رکھنے کے اس طریقہ کار کی معلومات رکھنے والے کسی فرد کا ہاتھ ضرور ہوگا۔گھر کے اندر اور احاطے میں حالانکہ سی سی ٹی وی کیمرے لگے ہوئے تھے،مگر اتفاق سے وہ کیمرے آن نہیں تھے۔
چوری کی اس واردات کی اطلاع ملنے پر ڈی وائی ایس پی کمار سوامی، سرکل انسپکٹرنوین چندرا جوگی اور دیگر پولیس افسران نے جائے واردات پر پہنچ کر معائنہ کیااور اتنے دنوں سے گھر خالی رکھنے اور مقفل رہنے کے تعلق سے پولیس کو پہلے سے اطلاع نہ دینے پر سوریاکمارکے بیٹے کو ڈانٹ سنائی۔
یہاں یہ بات قابل ذکر ہے کہ اس سے قبل سن 2012میں بھی سوریا کمار کے گھر میں ڈکیتی کی واردات انجام د ی گئی تھی۔ اس وقت سوریا کمار کے ہاتھ پیر باندھ کر اور منھ میں کپڑاٹھونس کر لاکھوں روپے مالیت کے زیورات اڑالیے گئے تھے۔اس وقت پولیس نے تفتیش کے بعد 8لٹیروں کوگرفتار کرکے مسروقہ مال برآمد کرلیا تھا۔
