کاروار میں سونے کے زیورات چرا کر فرار ہونے والا چند ہی گھنٹوں میں گرفتار
کاروار 5؍اکتوبر (ایس او نیوز) گھر میں گھس کر تقریباً 17تولہ وزن کے سونے کے زیورات چرالیے جانے کی شکایت موصول ہونے پر پولیس نے بڑی مستعدی سے کارروائی کی اورملاپور پولیس اسٹیشن کے سب انسپکٹر سی آر پُٹا سوامی نے کدرا سرکل پولیس انسپکٹر کی قیادت میں صرف 6 چند گھنٹوں کے اندرچورکو گرفتار کرلیا ۔
بتایا جاتا ہے کہ ملاپور کے دتاتریہ بابوراؤ نائک نے20ستمبر کو اپنے گھر کی الماری سے سونے کے زیورات چوری ہونے کی شکایت 4اکتوبر کو درج کروائی تھی۔ پولیس نے شکایت کنندہ دتاتریہ کے قریبی مکان میں رہنے والے سنجے پاٹل کو شک کی بنیاد پر اپنی میں تحویل میں کر سختی سے تفتیش کی تو ملزم نے اپنے جرم کا اقرار کرتے ہوئے بتایا کہ شہر کے بازار میں موجود وینکٹیش جیویلرس کو یہ زیورات فروخت کردئے ہیں۔ملزم کے بیان کی روشنی میں وینکٹیش جیویلرس کے مالک کو بھی پولیس نے اپنی تحویل میں لے لیا ہے۔
پتہ چلا ہے کہ چرائے گئے زیورات فروخت کرنے کے بعد ملزم سنجے نے ایک سیکنڈ ہینڈ کار بھی خرید لی ہے۔اس کے علاوہ اس کے قبضے سے قیمتی موبائل فون بھی برآمد ہوا ہے ۔جس کی وجہ سے شبہ کیا جارہا ہے کہ کچھ دن پہلے ہی ملاپور کے علاقے میں ہیگڈے ایجنسی نامی موبائل کی دکان میں جو ڈکیتی ہوئی تھی اس میں بھی شاید سنجے کا ہاتھ ہے۔کہاجاتا ہے کہ سنجے بے روزگار نوجوان ہے مگر اس کی تین تین بیویاں ہیں۔
