سرسی :گھر میں تنہا عورت کی آنکھوں میں مرچ کا پاؤڈر ڈال کر چوری کی ناکام کوشش
سرسی19؍مارچ (ایس او نیوز) مضافاتی علاقے اجّے بیل میں دو افراد نے گھر کے اندرگھس وہاں پر موجود تنہا عورت کی آنکھوں میں مرچ کا پاؤڈر ڈالا اور لوٹ مچانے کی کوشش کی۔
بتایاجا تا ہے کہ لکشمی لکشمی نارائن کے گھر پر پہنچ کر دولوگوں نے پینے کے لئے پانی طلب کیا۔جب وہ خاتون پانی لینے اندر چلی گئی تو لٹیروں کو معلوم ہوگیا ہے کہ گھر کے اندر کوئی اور موجود نہیں ہے۔ جیسے لکشمی پانی لے آئی انہوں نے مرچ کا پاؤڈر اس کے چہرے پر اچھال دیا۔پھر اس کے منھ میں کپڑاٹھونس دیا ۔اس کے بعد ایک ملزم نے لکشمی کے دونوں ہاتھ مضبوطی سے پکڑ لیے جبکہ دوسرا شخص گھر کے اندرالماریوں میں زیورات اور نقدی تلاش کرنے لگا۔ اسی دوران گھر سے قریب واقع باغ میں موجود لکشمی کے بیٹے کو اپنے گھر سے چیخ و پکار کی آوازیں سنائی دیں تو وہ دوڑتا ہوا موقع پر پہنچ گیا۔لکشمی کے بیٹے کو گھر کی طرف آتے ہوئے دیکھ کر لٹیرے وہاں سے فرار ہونے میں کامیاب ہوگئے۔
اس واقعے کے تعلق سے سداپور پولیس اسٹیشن میں شکایت درج کی گئی ہے۔گھر میں موجود سی سی کیمرے کی فوٹیج بھی پولیس نے اپنی تحویل میں لی ہے۔
چونکہ سرسی سداپور کے مضافاتی علاقوں میں اس سے پہلے بھی تنہا گھروں میں ڈکیتی اور لوٹ کے واقعات پیش آتے رہے ہیں، اس لئے تازہ واقعے کے بعد ایک بار پھر یہاں کے عوام میں خوف ودہشت کا ماحول پیدا ہوگیا ہے۔