مغربی بنگال میں فرقہ پرستی کے لیے کوئی جگہ نہیں،ممتابنرجی نے سخت پیغام دیا، مذہبی تعصب کے خلاف قدم ناقابل برداشت قراردیا
جلپائی گوڑی:28/مارچ (ایس او نیوز/آئی این ایس انڈیا)وزیراعلیٰ ممتابنرجی نے مغربی بنگال کے لوگوں سے مذہب کو لے کر ملک بھر میں جاری ماحول پر توجہ نہ دینے کی اپیل کی ہے۔جلپائی گوڑی میں منگل کو ایک تقریب سے خطاب کرتے ہوئے انہوں نے ریاست سے مذہب کے نام پرتعصب سے دوررہنے کی اپیل کی۔ اتر پردیش اسمبلی انتخابات میں بی جے پی کی جیت کے بعدیوگی آدتیہ ناتھ کووزیراعلیٰ بنائے جانے کولے کرملک بھرمیں ہندومذہب پرجاری بحث کی طرف اشاراکرتے ہوئے محترمہ بنرجی نے کہا کہ ہندو مذہب بہت بڑامذہب ہے۔ اسے کمترنہیں کیاجاسکتا۔ انہوں نے کہا کہ مذہب کے نام پر آپس میں اختلافات پیدا کرنامناسب نہیں ہے۔وزیراعلیٰ نے بی جے پی کا نام لئے بغیر وارننگ دیتے ہوئے کہا کہ اگر کوئی بنگال کو بری نظر سے دیکھے گا تو اسے برداشت نہیں کیا جائے گا۔ بنگال میں مذہبی تعصب کے لئے کوئی جگہ نہیں ہے۔ انہوں نے لوگوں سے بغیر خوفزدہ ہوئے اس کا سخت جواب دینے کی ہدایت دی۔ انہوں نے کہا کہ بنگال کی زمین پر بزدلوں کے لئے کوئی جگہ نہیں ہے۔ ممتابنرجی نے کہا کہ ریاست میں کوئی فساد پھیلانے کی کوشش کرتا ہے تو اس کے خلاف آواز بلند کرے۔ وزیراعلیٰ نے کہا کہ بھارت کا آئین مذہب غیر متنازع ملک کی بات کہتا ہے۔ تمام ہم وطنوں کو ساتھ لے کر آگے بڑھنے کی نصیحت دیتاہے۔