بھٹکل کینرا بینک کے ATM میں چوری کی ناکام کوشش؛ باہر لگا ہوا سی سی ٹی وی کیمرہ غائب
بھٹکل 15/جون (ایس او نیوز) یہاں رنگین کٹہ نیشنل ہائی وے پر واقع کینرا بینک کے ATM میں گھس کر چوروں نے اے ٹی ایم مشین کو کھول کر رقم لے جانے کی کافی کوشش کی ہے، مگر مشین کا ایک حصہ کھولنے کے بعد رقم رکھے جانے والے خانوں کو کھولنے میں چور غالباً ناکام ہوئے ہیں، اس لئے اُنہیں خالی ہاتھ لوٹنا پڑا ہے۔
پولس نے بتایا کہ رات قریب دو بجے بائک پر سے گذرنے والے دو نوجوانوں نے اے ٹی ایم مشین کے قریب کچھ گڑبڑی محسوس کی اور انہوں نے فوری رات کو گشت کرنے والی پولس کو خبر کی، اس سے پہلے کہ پولس موقع پر پہنچتی چور رفوچکر ہوچکے تھے۔ پولس نے بتایاکہ چوروں نے کینرا بینک اے ٹی ایم کے اندر گھس کر پہلے شٹر بند کیا، پھر مشین کو کھولنے کی کوشش کی، سمجھا جارہا ہے کہ اس دوران ایک چور باہر کھڑے ہوکر نگرانی کررہا ہوگا، جیسے ہی اُنہیں محسوس ہوا کہ باہر سے گذرنے والے کچھ لوگوں نے واقعے کے تعلق سے نوٹس لیا ہے تو وہ فوراً مشین کو اُسی حال میں چھوڑ کر فرار ہوگئے۔
دیکھا گیا ہے کہ اے ٹی ایم کے باہر لگا ہوا ایک سی سی ٹی وی کیمرہ غائب ہے، جبکہ باہرموجود الارم کا کیبل بھی کٹا ہوا ہے، سمجھا جارہا تھا کہ الارم کے کیبل کو ہاتھ لگانے پر بھی الارم بجنا چاہئے تھا، مگر الارم نہیں بجا۔
ذرائع سے ملی اطلاع کے مطابق کل بدھ کی شام کو ہی اس اے ٹی ایم میں قریب دس لاکھ کی رقم جمع کرائی گئی تھی، پولس کے مطابق چوروں کو رقم جمع کرانے کے تعلق سے خبر ملنے کے بعدہی انہوں نے چوری کی کوشش کی ہے، اس بناء پر پولس اندر کے ہاتھ سے بھی انکار نہیں کررہی ہے۔
واقعے کی اطلاع ملتے ہی کاروار سے فنگرپرنٹس کے ماہرین جائے واردات پر پہنچے اور فنگر پرنٹس حاصل کرنے کی کوشش کی۔ بعد میں جب اندرونی سی سی ٹی وی کیمرہ کی فوٹیج کی جانچ کی گئی تو پتہ چلا کہ چوروں نے نقاب اوڑھ رکھا تھا اورہاتھوں میں دستانے تھے۔
اے ٹی ایم میں کوئی سیکورٹی اہلکار موجود نہیں ہے، اس تعلق سے دھارواڑ سے تشریف فرما بینک کے ایک اعلیٰ اہلکار نے بتایا کہ اس اے ٹی ایم سے بینک کو اتنا زیادہ فائدہ نہیں ہورہا ہے کہ سیکوریٹی اہلکار کی تنخواہ نکل سکے، البتہ وہ اب اس چوبیسوں گھنٹے کھلے رہنے والے اے ٹی ایم کو رات 9:30 بجے کے بعد شٹر ڈال کر بند کرنا بہتر سمجھتے ہیں۔
بھٹکل ٹائون پولس معاملے کی مزید جانچ کررہی ہے۔