جے پور:26/اپریل (ایس او نیوز/آئی این ایس انڈیا) راجستھان اسمبلی میں ہنگامہ کرنا کانگریس کے ممبران اسمبلی کو مہنگا پڑا۔اسمبلی صدر نے ڈسپلن شکنی کے الزام میں کانگریس کے12ممبران اسمبلی کو معطل کر دیا ہے،جبکہ ان کا ساتھ دینے والے ایک بی ایس پی ممبر اسمبلی اور ایک آزاد ممبر اسمبلی کو بھی معطل کردیا گیاہے، اسمبلی اسپیکر نے تمام ممبران اسمبلی کو ایک سال کے لیے معطل کیا ہے۔دراصل کانگریس ممبر اسمبلی گووند سنگھ دوتاسرا وقفہ سوال کے دوران سوال پوچھنے لگے، لیکن اسمبلی صدر نے انہیں اس کی اجازت نہیں دی۔اس سے ناراض ہو کر کئی ممبر انِ اسمبلی ایوان کے بیچوں بیچ آکر ہنگامہ کرنے لگے، ممبران اسمبلی کے ہنگامے کی وجہ سے اسمبلی صدر کو دو بار ایوان کی کارروائی ملتوی کرنی پڑی۔ممبران اسمبلی کے طرز عمل کو اسمبلی اسپیکر کیلاش میگھوال نے ڈسپلن شکنی قراردیا، اس کے بعد ہنگامہ کرنے والے ممبران اسمبلی کے خلاف ایک سال کی معطلی کی تجویز صوتی ووٹنگ سے منظور کرلی گئی۔اسمبلی کے صدر کیلاش میگھوال کے حکم پر مارشل نے اپوزیشن لیڈر رامیشور ڈوڈی سمیت ہنگامہ کر رہے اپوزیشن ارکان کو اٹھا کر ایوان سے باہر نکال دیا۔صدر کے حکم پر سیکورٹی اہلکار نے سب سے پہلے کانگریس کے گووند ڈوٹاسرا اور بعد میں ایک ایک کر کے باقی سبھی اپوزیشن کے ارکان کو ایوان سے باہر نکال دیا۔ اس دوران کانگریس کے دھیر گوجر، منوج نیاگلی سمیت 4 ارکان کی سیکورٹی سے معمولی  جھڑپ بھی ہوگئی۔کانگریس کی شکنتلا راوت کو بھی خاتون سیکورٹی اہلکار بغیر کسی مزاحمت کے ایوان سے باہر نکال دیا۔اسمبلی اسپیکر کیلاش میگھوال نے ایوان میں ممبران اسمبلی کے ہنگامے پر افسوس ظاہر کیاہے۔انہوں نے مانا کہ کچھ ممبران اسمبلی نے ایوان کی روایات اور اصول کی خلاف ورزی کی ہے، جس کے بعد ان کے خلاف قدم اٹھایا گیاہے۔