بنگلورو:5/مئی(ایس او  نیوز) ریاستی بی جے پی میں سنگین بحران اور بی جے پی صدر یڈیورپا اور کونسل کے اپوزیشن لیڈر ایشورپا کے درمیان شدید اختلافات کے قطع نظر کل میسور میں بی جے پی کی مجلس عاملہ کی میٹنگ شروع ہونے جارہی ہے، حالانکہ یڈیورپا نے واضح طور پر اعلان کردیا ہے کہ اس مجلس عاملہ میں دانستہ طور پر غیر حاضر رہنے والوں کے خلاف سخت تادیبی کارروائی کی جائے گی، اس کی پرواہ کئے بغیر ایشورپا اور دیگر ناراض لیڈروں نے واضح کردیا ہے کہ وہ اس میٹنگ میں غیر حاضر رہیں گے۔ بتایاجاتاہے کہ اعلیٰ کمان کی طرف سے بھی یڈیورپا کو یہ اختیار دیا گیا ہے کہ اس میٹنگ سے غیر حاضر رہنے والوں کے خلاف تادیبی کارروائی کریں۔ ریاستی بی جے پی میں اٹھنے والے بحران کو فوری طور پر قابو میں کرنے کیلئے آج کرناٹک میں بی جے پی امور کے انچارج مرلی دھر راؤ بنگلور پہنچے۔ بتایاجاتاہے کہ وہ خود یڈیورپا اور ایشورپا کے درمیان مصالحت کی کوشش کرنے والے تھے، لیکن 8مئی کو رائچور میں سنگولی راینا برگیڈ کے جلسے کی تیاریوں میں مصروف ایشورپا نے مرلی دھر راؤ سے ملاقات کرنے سے معذرت کی ہے۔ بتایا جاتاہے کہ ریاست کی صورتحال کے متعلق تفصیلی رپورٹ وہ بی جے پی کے قومی صدر امیت شا کو پیش کریں گے اور انہیں بتائیں گے کہ ریاست کی صورتحال میں کس قدر بگاڑ آیا ہے۔بتایاجاتا ہے کہ کل میسور کی میٹنگ میں شرکت کیلئے ریاست کے مرکزی وزراء اننت کمار، سدانند گوڈا، رمیش جگا جنگی اور نرملا سیتا رامن کی شرکت یقینی ہے۔ ساتھ ہی ریاستی بی جے پی صدر یڈیورپا اور مرلی دھر راؤ موجود رہیں گے، تاہم ایشورپا اور ان کے گروپ نے غیر حاضری کا اعلان کیا ہے، جبکہ کرناٹک میں آر ایس ایس کے انچارج اور بی جے پی کے قومی سکریٹری سنتوش کو اس میٹنگ میں شرکت سے روکنے کیلئے یڈیورپا گروپ کو شش کررہا ہے۔ ایشورپا گروپ اس معاملہ میں یڈیورپا کو بے نقاب کرنا چاہتا ہے کہ وہ ریاست میں آر ایس ایس کی مرضی کے خلاف بی جے پی کو اپنے قبضے میں کرنے کی کوشش کررہے ہیں