نئی دہلی:16/اگست(ایس او نیوز /آئی این ایس انڈیا)جشنِ آزادی کے موقع پر حاجی مولانا قاری عبدالغفار کے حکم سے طلبا جامعہ عربیہ بیت العلوم مصطفی آباد دہلی نے مختصر پروگرام کا انعقاد کیا۔ جامعہ کے ناظم تعلیمات مولانا محمود حسن امینی نے نظامت کے فرائص انجام دیا۔پروگرام میں طلبا وطالبات سے خطاب کرتے ہوئے قاری عبدالغفار نے کہاکہ ملک کو انگریزوں کی بربریت سے آزادی دلانے کے لیے ہمارے علماء4 اور اکابر اسلاف کی قربانیاں یہاں کی در ودریوار میں نقش ہیں، اور یہ حقیقت ہے کہ مدارس اسلامیہ کے متوالے اگر میدان جنگ میں نہ اترتے تو ملک آزاد نہ ہوتا،آج مدارس اسلامیہ کی کردار کشی کی ناپاک کوششیں ہورہی ہیں اور ان کی ملک دوستی کو آزمایا جارہا ہے جو کسی بھی حالت میں ملک کے مفاد میں نہیں ہے۔اس موقع پر مولانا جمشید ،مولانا امان اللہ قاسمی نے بھی جنگِ آزادی میں علماء کے کردار پر روشنی ڈالی۔ پروگرام میں جامعہ کے اساتذہ مفتی عبدالمقتدر،مفتی عبداللہ، مفتی شاکر،مفتی نقی،مولانا عمر،مولاناعبدالستار،قاری وسیم،قاری انس وغیرہ کے علاوہ علاقہ کے ذمہ داران نے شرکت کی۔