بنگلورو:21/اپریل(ایس او نیوز) ننجنگڈھ اور گنڈل پیٹ اسمبلی حلقوں کے ضمنی انتخابات میں منتخب کانگریس اراکین اسمبلی کللے کرشنا مورتی اور ڈاکٹر گیتا مہادیو پرساد نے آج اپنی اسمبلی رکنیت کا حلف لیا۔ ودھان سودھا کے بینکویٹ ہال میں منعقدہ تقریب میں ان دونوں کو اسمبلی اسپیکر کے بی کولیواڈ نے رکنیت کا حلف دلایا۔ پہلے ننجنگڈھ سے منتخب کللے کرشنا مورتی نے رکنیت کاحلف لیا اور بعد میں ڈاکٹر گیتا مہادیو پرساد نے حلف اٹھایا۔وزیراعلیٰ سدرامیا، ریاستی وزراء اور اراکین اسمبلی اس موقع پر موجود رہے، حلف برداری کے بعد اخباری نمائندوں سے بات چیت کرتے ہوئے ڈاکٹر گیتا پرساد نے کہا کہ ریاستی کابینہ میں انہیں شامل کرنے یا نہ کرنے کے متعلق وزیر اعلیٰ سدرامیا یا کسی اور نے ان سے کوئی بات چیت نہیں کی ہے، البتہ سدرامیا نے اگر ان پر اعتماد کرکے وزارت کی ذمہ داری سونپی تو وہ نبھانے کیلئے تیار ہیں۔انہوں نے کہاکہ ضمنی انتخابات میں انہیں کامیاب بنانے والے گنڈل پیٹ کے عوام کی وہ ہمیشہ ممنون رہیں گی، ان کے شوہر مہادیو پرساد نے حلقہ میں تقریباً 85 فیصد ترقیاتی کام مکمل کئے ہیں، باقی کاموں کو پورا کرنے کی طرف وہ پوری توجہ دیں گی۔ ننجنگڈھ سے اسمبلی کیلئے پہلی بار منتخب کللے کرشنا مورتی نے کہاکہ ان کی پوری توجہ اپنے حلقہ کی ترقی پر مرکوز رہے گی۔ ضمنی انتخابات میں پوری ذمہ داری لے کر وزیر اعلیٰ سدرامیا نے انہیں کامیاب بنایا ہے، اس کے ساتھ ہی ریاستی وزیر ڈاکٹر ایچ سی مہادیو پا، رکن پارلیمان دھروا نارائن اور دیگر سبھی پارٹی لیڈران نے ان کیلئے محنت کی ہے، جس کیلئے وہ ان کے مشکور رہیں گے۔ وزارت کے متعلق سوال پر انہوں نے کہاکہ اس کا اختیار وزیر اعلیٰ سدرامیا کو ہے انہیں جو بھی ذمہ داری دی جائے اسے وہ نبھاتے ہوئے ان کے پاس دستیاب ایک سال کی مدت میں اپنے حلقہ کے عوام کیلئے بہتر سے بہتر کام کرکے دوبارہ ان کے سامنے جاناچاہیں گے۔