ضمنی چناؤ میں ہار کا بی جے پی محاسبہ کرے گی: یڈیورپا
بنگلورو:14/اپریل(ایس او نیوز) سابق وزیر اعلیٰ اور ریاستی بی جے پی صدر بی ایس یڈیورپانے کہاکہ ننجنگڈھ اور گنڈل پیٹ ریاست میں حکمران کانگریس کے روایتی گڑھ رہے ہیں، اسی لئے ان حلقوں میں کامیابی مل سکی ہے، اس کے باوجود بھی دونوں حلقوں میں ناکامی کی وجوہات کا بی جے پی محاسبہ کرے گی۔ آج بی جے پی دفتر میں امبیڈکر جینتی تقریبات سے خطاب کرتے ہوئے یڈیورپانے دعویٰ کیا کہ مرکزی حکومت امبیڈکر کی امیدوں کے مطابق کام کررہی ہے، اور سماج کے تمام طبقات بشمول دلتوں کو انصاف دے رہی ہے۔ وزیراعظم مودی نے اپنے طریقہئ کار میں امبیڈکر کے طریقوں کو اپنایا ہے۔ انہوں نے کہاکہ مرکزی حکومت کی طرف سے دلتوں کی فلاح وبہبود کیلئے جو قدم اٹھائے گئے ہیں شاید وہ ننجنگڈھ حلقہ کے ووٹروں کی سمجھ میں نہیں آئے، جس کی وجہ سے اس حلقہ میں بی جے پی کو ہار کا منہ دیکھنا پڑا۔ انہوں نے کہا کہ ایک نتیجہ بی جے پی نے اپنی ہار سے یہ بھی اخذ کیا ہے کہ دلتوں کے محلوں میں بی جے پی کی منظم ٹیمیں موجود نہیں ہیں۔ انہوں نے کہاکہ ان انتخابات میں پارٹی کی کارکردگی کاجائزہ لینے جلد ہی تمام قائدین کی ایک میٹنگ طلب کی جائے گی۔ اس موقع پر مرکزی وزیر اننت کمار نے کانگریس پر دلتوں کے ساتھ دھوکہ کرنے کا الزام لگایا اور کہاکہ دلتوں سے ہمدردی کا جو دعویٰ کانگریس کرتی ہے وہ محض ڈھونگ ہے۔ انہوں نے کہاکہ ڈاکٹر امبیڈکر کو کانگریس حکومت نے کبھی ملک کے سب سے بڑے شہری اعزاز بھارت رتن سے سرفراز نہیں کیا۔کانگریس کے عدم تعاون کی وجہ سے امبیڈ کر پارلیمان کیلئے منتخب نہیں ہوپائے۔پارلیمانی انتخابات میں خود کانگریس نے امبیڈکر کے خلاف اپنا امیدوار کھڑا کیا۔