سائنس وٹیکنالوجی کے فروغ پر حکومت مکمل متوجہ: سدرامیا
بنگلور:17/جنوری(ایس او نیوز) ریاستی حکومت شعبہئ تعلیم وسائنس کو زیادہ سے زیادہ آگے بڑھانے اور فنڈز مہیا کرنے کیلئے ہمہ وقت تیار ہے۔ خاص طور پر سائنس کے شعبے میں تعلیم حاصل کرنے والے طلبا کی حوصلہ افزائی کرنے تیار ہے۔ یہ بات آج وزیر اعلیٰ سدرامیا نے کہی۔ جواہر لال نہرو پلانیٹوریم میں 12.5 کروڑ روپیوں کی لاگت سے نصب نئے ہائی بریڈ پروڈکشن سسٹم کے ذریعہ سیاروں اور ستاروں کا مشاہدہ کرنے کے نظام کا افتتاح کرتے ہوئے وزیر اعلیٰ نے کہاکہ سائنس وٹیکنالوجی کے فروغ کیلئے حکومت ہر طرح کی مدد فراہم کرنے کیلئے تیار ہے۔ انہوں نے کہاکہ بچوں میں سائنس کے تئیں رجحان پیدا کرنے کی اشد ضرورت ہے۔ سدرامیا نے بتایا کہ بہت جلد حکومت بنگلور کے علاوہ ہبلی، منگلور، باگلکوٹ اور بیجاپور میں بھی پلانیٹوریم قائم کرکے وہاں سائنس وٹیکنالوجی کو بڑھاوا دینے کی کوشش کرے گی۔ انہوں نے کہا کہ سائنس وٹیکنالوجی کے شعبے میں اتنی ترقی کے باوجود آج بھی اندھا اعتقاد برقرار ہے، بلکہ بعض اوقات اندھے اعتقادات بے قابو حدود تک بڑھتے جارہے ہیں، اس کے خلاف عوام میں بیداری لانے کی ضرورت ہے۔انہوں نے کہاکہ چاند گرہن اور سورج گرہن ایک مکمل سائنسی عمل ہے، لیکن ان کی مدت کے دوران لوگ گھروں سے باہر نکلنا بھی پسند نہیں کرتے۔ لیکن مزدور طبقات ان تمام امور سے بے پرواہ اپنی گزر برسر کی تلاش میں نکل پڑتا ہے۔ انہوں نے کہاکہ ہندوستانی تہذیب میں سورج، چاند ستاروں اور سیاروں کی پوجا کی جاتی ہے، لیکن اس کے سائنسی حقائق کو جاننے کی بھی اشد ضرورت ہے۔ انہوں نے کہاکہ بدعقیدگی اور توہم پرستی کو بڑھاوا دینے کیلئے کچھ طاقتیں مسلسل سرگرم ہیں۔حکومت چاہتی ہے کہ ان طاقتوں کے منصوبوں کو ناکام بنایا جائے اور سائنٹفک حقائق کے ذریعہ حالات حاضرہ کا سامنا کرنے کی صلاحیت بچوں میں اجاگر کی جائے۔