راجیو گاندھی یونیورسٹی کی منتقلی کیلئے آج تاریخ کا تعین: شیوکمار
بنگلور:18/مارچ(ایس او نیوز)شہر کے راجیوگاندھی ہیلتھ سائنسس یونیورسٹی کو رام نگرم منتقل کرنے پر گورنر کی طرف سے کوئی اعتراض نہیں کیاگیا ہے، بلکہ طے شدہ پروگرام کے تحت کل یونیورسٹی کو منتقل کرنے کے عمل کو آگے بڑھایا جائے گا۔ یہ بات آج وزیر توانائی اور رام نگرم ضلع کے انچارج وزیر ڈی کے شیوکمار نے کہی۔ انہوں نے کہاکہ کل صبح گیارہ بجے رام نگرم کے ریوینیو بھون میں یونیورسٹی کے آغاز کی تقریب منعقد کی گئی ہے۔ایک اخباری کانفرنس سے خطاب کرتے ہوئے انہوں نے کہاکہ راجیو گاندھی ہیلتھ یونیورسٹی کو منتقل کئے جانے پر گورنر نے روک لگا رکھی ہے، یہ خبریں سراسر افواہ ہیں۔ انہوں نے کہاکہ جنتادل (ایس) بی جے پی مخلوط حکومت کے دور میں اس وقت کے وزیر اعلیٰ ایچ ڈی کمار سوامی نے ہی راجیو گاندھی ہیلتھ یونیورسٹی کورام نگرم منتقل کرنے کا تیقن دیاتھا۔ اس وقت سے بھی وہ اس یونیورسٹی کو منتقل کرنے کی مسلسل جدوجہد میں لگے ہوئے ہیں۔ انہوں نے کہاکہ یونیورسٹی کے مکمل انفرااسٹرکچر کی تعمیر کیلئے درکار نجی اور سرکاری زمین کو اکوائر کرنے کیلئے پہل کی جاچکی ہے۔زمین اکوائرکرنے کے سلسلے میں بعض کسانوں کو مناسب معاوضہ بھی ادا کیا گیا ہے۔ وزیراعلیٰ سدرامیا کی صدارت میں یونیورسٹی کے عہدیداروں اور دیگر سرکاری عہدیداروں کی موجودگی میں ایک کمیٹی تشکیل دی گئی ہے۔تعمیر کی پوری ذمہ داری محکمہئ تعمیرات عامہ لے گا۔ انہوں نے کہاکہ یونیورسٹی کیلئے جو بھی زمین حاصل کی جائے گی، اس کیلئے کسانوں کو مناسب معاوضہ ادا کرنے کیلئے بھی ضروری قدم اٹھائے جارہے ہیں۔ انہوں نے کہاکہ یونیورسٹی کیلئے بنیادی ڈھانچہ مہیا کرانے کا کام بہت پہلے ہی شروع ہوچکا ہے۔ ضلع کے انچارج وزیر ہونے کے ساتھ وہ میڈیکل ایجوکیشن کے وزیر ڈاکٹر شرن پرکاش پاٹل کے ہمراہ عنقریب گورنر واجوبھائی والا سے ملاقات کرکے اس سلسلے میں حکومت کا موقف واضح کریں گے۔ حال ہی میں گورنر سے ہوئی ملاقات کے دوران بھی گورنر نے اس مجوزہ یونیورسٹی پر اپنی طرف سے کسی طرح کے اعتراض کی خبروں کو مسترد کردیا۔