بنگلورو:4/اگست(ایس  او نیوز)  ڈی کے شیوکمار کے ٹھکانوں پر محکمۂ انکم ٹیکس کے چھاپوں سے پیدا شدہ صورتحال میں بی جے پی کے پروپگنڈہ کو ناکام کرنے کے سلسلے میں آج وزیر اعلیٰ سدرامیا نے اپنی کابینہ کے سینئر رفقاء کے ساتھ تفصیلی بات چیت کی۔ شیوکمار کے گھر اور دیگر مقامات پر چھاپوں کی خبروں کو ملک بھر میں پھیلاکر ملک میں کانگریس کو بدنام کرنے کیلئے بی جے پی نے جو طریقۂ کار اپنایا ہے ، وزیر اعلیٰ نے اس کا جواب دینے واضح حکمت عملی اپنانے پر زور دیا اور وزراء کو ہدایت دی کہ آنے والے دنوں میں بی جے پی کو ضرور اس کا سبق سکھانا چاہئے۔ وزیر اعلیٰ نے یہ بھی مشورہ کیا کہ پچھلی بی جے پی حکومت کے دور میں جو بھی دھاندلیاں ہوئی ہیں ان کی تحقیقات از سر نو شروع کرائی جائیں، اور ان لیڈروں کے گھروں پر فوری طور پر لوک آیوکتہ ، اے سی بی اور سی آئی ڈی کے چھاپوں کی تیاری کی جائے۔ساتھ ہی چھاپوں کے دوران جو کچھ بھی برآمد کیا جائے گا اسے میڈیا کے ذریعہ اچھالا جائے۔ مختلف گھپلوں کے تعلق سے اب تک بی جے پی لیڈروں کے جو بھی دستاویزات حکومت کے پاس ہیں حکومت نے ان تمام کو منظر عام پر لانے کا فیصلہ کیا ہے، تاکہ بی جے پی قائدین کی ساکھ متاثر کی جاسکے ۔ میٹنگ میں ریاستی وزراء ٹی بی جئے چندرا، کاگوڈ تمپا، بسوراج رایا ریڈی، ایم بی پاٹل، ڈاکٹر ایچ سی مہادیوپا اور ایچ آنجنیا وغیرہ موجود تھے۔