بنگلور:17/جنوری(ایس او نیوز) شہر میں کل دوپہر منتری مال کے عقبی حصہ کی دیوار گرجانے کے بعد اس مال کو دی گئی آکیو پینسی سرٹی فکیٹ منسوخ کردی گئی اور مال کو بے مدت بند کردینے کا فیصلہ لیا گیا۔ بتایاجاتاہے کہ بی بی ایم پی کے حلقوں میں اب اس بات پر بحث شروع ہوگئی ہے کہ بی بی ایم پی کے اس مال کو جلد از جلد منہدم کردیا جائے۔ بی بی ایم پی کے جوائنٹ کمشنر پی آر پلنگپا نے کہاکہ اس سلسلے میں بی بی ایم پی کے شعبہئ انجینئرنگ اور دیگر ماہرین کی کمیٹیاں منتری مال کی دوسری اور تیسری منزل کا جائزہ لینے میں مصروف ہیں۔ اس جائزہ کی تکمیل کے بعد ہی بتایاجاسکتا ہے کہ اس مال کو برقرار رکھا جائے اور جلداز جلد دیوار گرنے کی وجہ سے جو نقصان ہوا ہے اسے کم کیا جائے، بصورت دیگر اس مال کو گرادیا جائے۔ جوائنٹ کمشنر نے بتایاکہ ماہرین کی طرف سے عمارت کو جو نقصان پہنچا ہے اس کا جائزہ لیاجارہا ہے۔ بی بی ایم پی افسران نے بتایاکہ کل دیوار گرنے کے سبب جو نقصانات ہوئے ہیں اس کے ساتھ ہی منتری مال کے ڈھانچہ کو جو خطرہ لاحق ہے اس کا جائزہ لینے کیلئے جلد ہی تحقیقاتی ٹیم اپنا کام شروع کردے گی۔ منتری مال کی تیسری اور چوتھی منز ل کے عقبی حصہ میں کل دیوار کے اچانک گرجانے کی وجہ سے کل ہی سے مال کی تمام سرگرمیاں مکمل طور پر بند کردی گئی ہیں۔ بتایا جاتاہے کہ مال کا جائزہ لینے کے بعد اگر یہ نتیجہ اخذ ہوا کہ یہ عمارت استعمال کے قابل نہیں ہے تو بی بی ایم پی بلامروت اسے منہدم کرنے کے احکامات صادر کرسکتی ہے۔ تاہم بی بی ایم پی کمشنر کی طرف سے اس مال کو دی گئی اجازت منسوخ کرنے کے فیصلے کے سبب اس سے نمٹنے میں تاخیر کے اندیشے ظاہر کئے جارہے ہیں۔