نئی دہلی :11/ڈسمبر ( ایس او نیوز) 2019ء کے لوک سبھا انتخابات سے قبل حکمراں بی جے پی اور اپوزیشن کانگریس کے لیے وقار کا مسئلہ سمجھے جانے والے پانچ ریاستی اسمبلیوں کے انتخابات میں بی جے پی کو سخت ہزیمت اٹھانی پڑی جب اپوزیشن کانگریس نے چھتیس گڑھ اور راجستھان میں بھاری اکثریت سے فتح کے ساتھ بی جے پی سے اقتدار چھین لیا ۔ مدھیہ پردیش میں انتہائی سخت مقابلہ کے درمیان کانگریس کو بی جے پی پر سبقت حاصل ہوچکی ہے اور ممکن ہے کہ وہ اس ریاست میں گزشتہ 15سال سے برسراقتدار بی جے پی سے حکومت چھین لے گی ۔ اس طرح ایک طویل وقفہ کے بعد تین ہندی ریاستوں میں اس کی حکومت قائم ہوگی ۔ جنوبی ریاست تلنگانہ میں علاقائی جماعت ٹی آر ایس نے کانگریس کے زیرقیادت اپوزیشن اتحاد عوامی محاذ کو بھاری اکثریت سے شکست دے دی ۔ شمال مشرقی ریاست میزورم میں میزونیشنل فرنٹ نے کانگریس کو شکست دے کر 10سال کے وقفہ کے بعد اقتدار پردوبارہ قبضہ کرلیا۔ جس کے ساتھ ہی شمال مشرقی کی تمام سات ریاستوں سے کانگریس اقتدار کا صفایاہوگیاہے ۔ 90رکنی چھتیس گڑھ اسمبلی کانگریس کو 62اور بی جے پی کو صرف 13نشستیں حاصل ہوئی ہیں ۔ اپوزیشن جماعت کی دو تہائی اکثریت سے فتح کے بعد بی جے پی کے چیف منسٹر رمن سنگھ نے گورنر کو استعفیٰ پیش کردیا۔ انہوں نے بی جے پی کی بدترین شکست کی ذمہ داری سے اپنی پارٹی کی قومی قیادت کو بری رکھتے ہوئی کہاکہ ریاستی مسائل اور ایجنڈوں پر انتخابات لڑے گئے تھے جس کا دہلی سے کوی تعلق نہیں ہے ۔ 200رکنی راجستھان اسمبلی میں کانگریس کو 100سے زائد نشستوں پر فتح حاصل ہوچکی ہے ۔ بی جے پی کو تقریباً 60نشستیں حاصل ہوئی ہیں ۔ کانگریس کے فاتح امیدواروں میں جوہری لعل جاٹ، پرشانت بیرورشامل ہیں ۔ راجستھان میں کانگریس کی فتح کو اشوک گہلوٹ اور سچن پائلٹ کے درمیان اتحاد کا مظاہرہ سمجھاجارہاہے ، کانگریس لیجسلیچر پارٹی کا اجلاس کل منعقدہوگا۔ جس میں آئندہ چیف منسٹر کے انتخاب پر غور کیاجائے گا، جس میں شرکت کرنے والے اے آئی سی سی مبصرین ہائی کمان کو رپورٹ پیش کریں گے اور چیف منسٹر ا نتخاب کانگریس صدر راہول گاندھی کی مرضی پر منحصر ہوگا۔ 230رکنی مدھیہ پردیش اسمبلی کے لیے دو جماعتوں کے درمیان کانٹے کے مقابلے میں کانگریس کو 117اور بی جے پی کو 106نشستوں پر سبقت ہے ۔ مدھیہ پردیش کانگریس کمیٹی کے صدر کمل ناتھ نے کہاکہ ان کی پارٹی کو اکثریت حاصل ہوجائے گی ۔