بنگلورو:18/ اگست(ایس او نیوز) وزیر اعلیٰ سدرامیا نے کہاکہ ریاستی بی جے پی صدر بی ایس یڈیورپا کے خلاف انسداد کرپشن بیورو کی طرف سے اراضی ڈی نوٹی فکیشن معاملے میں ایف آئی آر درج کرنے کے پیچھے ریاستی حکومت کا ہاتھ قطعاً نہیں ہے، کیونکہ ریاست میں یا ملک کے کسی بھی حصہ میں کانگریس سیاسی انتقام پر یقین نہیں رکھتی۔ سیاسی انتقام بی جے پی کا شیوہ ہے نہ کہ کانگریس کا ۔ آج آلمٹی ذخیرہ لبریز ہوجانے کے سلسلے میں یہاں پوجا کرنے کے بعد اخباری نمائندوں سے بات چیت کرتے ہوئے انہوں نے کہاکہ دراصل بی جے پی اور اس پارٹی کے قائدین ریاست میں کانگریس حکومت اور کابینی وزراء پر انتقام کی سیاست کررہے ہیں۔ یڈیورپا کے اس الزام پر کہ ڈی نوٹی فکیشن کے معاملے میں ایف آئی آر درج کرواکر سدرامیا ان پر انتقام کی سیاست کررہے ہیں۔ سدرامیا نے کہاکہ اس معاملے میں انسداد کرپشن بیورو کی کارروائی آزادانہ طور پر ہوئی ہے، ریاستی حکومت کی طرف سے اس میں کوئی مداخلت نہیں ہوئی۔ پھر بھی یڈیورپا جن کو یہ بھرم ہوچکا ہے کہ آنے والے انتخابات میں بی جے پی اقتدار پر آئے گی، وہ یہ واضح کردینا چاہتے ہیں کہ کانگریس حکومت ریاست میں اقتدار چھوڑنے والی نہیں ہے۔ کانگریس کو اقتدار سے بے دخل کرنے کیلئے بی جے پی جو چاہے حربے آزمالے۔ ریاستی کابینہ میں توسیع کے متعلق ایک سوال کے جواب میں وزیراعلیٰ نے کہاکہ کل دورۂ دہلی کے دوران انہوں نے کانگریس نائب صدر راہول گاندھی سے تبادلۂ خیال کیا اور انہوں نے کابینہ میں توسیع کو منظوری دے دی ہے۔ عنقریب ریاستی کابینہ میں توسیع انجام دی جائے گی۔کرشنا طاس کے علاقوں میں زیر التواء آبپاشی منصوبوں کی تکمیل کے متعلق سوال پر سدرامیا نے کہاکہ ریاستی حکومت ان پراجکٹوں کی جلد از جلد تکمیل کی پابند ہے۔