تین ملین ڈالر کا فراڈ، تھائی پولیس نے 44 افراد گرفتار کر لیے
بنکاک،24جولائی(ایس او نیوز؍آئی این ایس انڈیا): تھائی لینڈ کی پولیس نے تین ملین ڈالر کے موبائل فون فراڈ میں ملوث 44 افراد کو حراست میں لے لیا ہے۔ ان افراد کا تعلق چین اور تائیوان سے ہے۔ اس موبائل فون فراڈ سے کم از کم 120 لوگ متاثر ہیں۔ تھائی پولیس نے مشتبہ افراد کی گرفتاری کے لیے سیاحتی مقام پتایا کے مختلف مکانات پر چھاپے مارے۔ گرفتار ہونے والوں میں انیس کا تعلق چین سے ہے اور پچیس تائیوان کے شہری ہیں۔ یہ لوگ بینکوں کے ملازمین اور پولیس اہلکار بن کر منی لانڈرنگ میں مصروف بتائے گئے ہیں۔ تھائی حکومت نے ان مشتبہ افراد کے اثاثوں کو بھی منجمد کر دیا ہے۔ پولیس کے مطابق یہ افراد مبینہ طور پر منشیات کی اسمگلنگ بھی کرتے ہیں۔